ПРАГА. Чэскі альпініст, які ўзыходзіў на вулкан Ключаўская сопка на Камчатцы, загінуў раней, чым выратавальнікі здолелі яго знайсьці. Пра гэта паведамілі прадстаўнікі міністэрства па надзвычайных сытуацыях Расеі.
Каманда выратавальнікаў шукае 18 чэскіх альпіністаў на вулкане. Сёньня выратавальнікі знайшлі трох альпіністаў, якія несьлі цела свайго сябра ў базавы лягер. Па зьвестках расейскага МНС , яшчэ чатыры альпініста знаходзяцца непадалёк ад кратэра вулкана, які “прачнуўся” ў апошнія дні.