ВАШЫНГТОН. Цэнтральнае ўпраўленьне выведкі ЗША ўзяло на сябе адказнасьць за абнародваную прэзыдэнтам ЗША Джорджам Бушам недакладную інфармацыю пра тое, што Ірак набываў уран ў адной з афрыканскіх краінаў. Дырэктар ЦРУ Джордж Тэнэт падцьвердзіў, што ягоная арганізацыя папярэдне праверыла прамову прэзыдэнта. ЦРУ паведаміла дарадніцы прэзыдэнта ў нацыянальнай бясьпеке Кандалізе Райс, што дадзеныя пра кантракт выклікаюць некаторы сумнеў, аднак у выніку гэтую інфармацыю пакінулі ў тэксце ў крыху зьмененым выглядзе. Прамова Буша фактычна стала абаснаваньнем ваеннай апэрацыі ў Іраку. Амэрыканская адміністрацыя й ўлады Вялікай Брытаніі абвяргаюць абвінавачваньні ў тым, што яны перабольшылі пагрозу, якая сыходзіла ад рэжыма Садама Хусэйна.