ВАШЫНГТОН. Рэспубліканская Партыя прэзыдэнта Злучаных Штатаў Джорджа Буша вярнула сабе кантроль над амэрыканскім Сэнатам і ўмацавала сваю перавагу ў Палаце Прадстаўнікоў. Паводле падлічаных на гэты момант галасоў на ўчорашніх выбарах, рэспубліканцы дамагліся 51 месца ў 100-асабовым сэнаце. У Палаце Прадстаўнікоў рэспубліканцы маюць цяпер 225 месцаў з 435 – на два болей, чым раней. Цяпер рэспубліканцы будуць кантраляваць усе сэнацкія камітэты, змогуць прызначаць сьпікера палаты і лідэра сэнацкай бальшыні, а таксама мець уплыў на вызначэньне тэрмінаў дэбатаў і галасаваньня ў Кангрэсе.