Бялград. Прэзыдэнт Югаславіі Ваіслаў Каштуніца заявіў, што дзеяньні віцэ-прэм’ера Мамчыла Пэрышача, якога падазраюць у шпіянажы, будуць дэталёва дасьледавацца. Прэзыдэнт Югаславіі таксама лічыць, трэба вывучыць і правамоцнасьць дзеяньняў вайсковай контарвыведкі, якая затрымала Пэрышача разам з амэрыканскім дыпляматам Джонам Дэвідам Нэйбарам.
Амэрыканскі дыплямат быў вызвалены праз 15 гадзінаў, аднак падчас затрыманьня яму не далі магчымасьці скантактавацца з амэрыканскай амбасадай. Вашынгтон выказаў пратэст з гэтай нагоды і назваў дзеяньні Бялграду парушэньнем міжнародных прававых нормаў, а амэрыканская амбасада назвала падазрэньні Нэйбара ў шпіянажы “хлусьнёй”.
Югаслаўская контарвыведка падазрае віцэ-прэм’ера Пэрышача ў тым, што ён перадаў амэрыканцам сакрэтныя дакумэнты. Віцэ-прэм’ер, які быў вызвалены з-пад варты ў суботу, абвяргае абвінавачаньні.
Тым часам прадстаўнікі югаслаўскіх спэцслужбаў заявілі, што абвінавачаньні ў шпіянажы могуць быць прад’яўленыя югаслаўскаму афіцэру, які звязаны зь віцэ-прэм’ерам.