ХАДЭРА, ІЗРАІЛЬ. Зь Ізраілю паведамляецца, што прынамсі 6 чалавек былі забітыя і яшчэ 30 параненыя, калі ўзброены палястынец распачаў страляніну ў банкетнай зале, дзе адбывалася сьвяточная цырымонія. Тэрарыст быў забіты паліцыянтамі.
Напад адбыўся ў горадзе Хадэра, на поўначы Ізраілю.
Адказнасьць за тэрарыстычны акт узяла на сябе палястынская тэрарыстычная групоўка “Пакутнікі Аль-Аксы”, якая зьвязаная з групоўкай “Фатх” Ясіра Арафата.
Ізраіль заявіў, што мае намер адплаціць за напад.
Злучаныя Штаты расцанілі атаку як “жахлівы тэрарыстычны акт” і запатрабавалі ад Арафата тэрміновых дзеяньняў супраць тых, хто стаіць за тэрарызмам.
У адказ на тэракт ізраільскія ваенныя самалёты сёньняшняй раніцы збамбавалі аб”екты палястынскіх сілаў бясьпекі ў Тулькарэме на Заходнім беразе Ярдану. Пра ахвяры пакуль не паведамляецца.