ІСЛЯМАБАД. Дзяржаўны сакратар ЗША Колін Паўэл, які візытуе ў Іслямабадзе, заявіў, што стабілізацыя палітычных і дыпляматычных адносінаў паміж Пакістанам і Індыяй на цяпер шмат важнейшая, чым неадкладная дэмілітарызацыя мяжы ў Кашміры. Паўэл таксама сказаў, што Злучаныя штаты будуць адыгрываць ролю пасярэдніка ў разьвязаньні кашмірскай праблемы. Дзяжаўны сакратар правёў перамовы з прэзыдэнтам Пакістану Пэрвэзам Мушарафам і заўтра накіруецца ў Індыю.