ТБІЛІСІ
Сёньня Абхазыя выкарыстала авіяцыю супраць узброенага атраду, які ўвайшоў у Кандорскую цясьніну на яе тэрыторыі. Грузыя заяўляе, што ўвяла ў цясьніну свае войскі для абароны грузынскіх паселішчаў. Грузынскія войскі ўвайшлі на абхаскую тэрыторыю ўпершыню з 1993 году. Парлямэнт Грузыі на закрытым паседжэньні прыняў сёньня пастанову пра вывад расейскіх міратворцаў з зоны грузына-абхаскага канфлікту. Лідэр абхаскіх сэпаратыстаў Ардзінба зьвярнуўся да прэзыдэнта Расеі Пуціна з просьбаю спыніць тое, што Ардзінба назваў палітыкаю дзяржаўнага тэрарызму з боку Грузыі. У цясьніне абхаскія сілы ўжо некалькі дзен вядуць баі з узброенай групоўкаю, якую складаюць грузыны, уцекачы з Абхазыі, і чачэнцы.