Браніслаў Камароўскі быў міністрам абароны ў папярэднім польскім урадзе і, магчыма, будзе займаць гэтую пасаду ў будучым кабінэце міністраў, бо “Грамадзянскай плятформа” – партыя, да якой ён належыць – ёсьць цяпер найбольш папулярнай палітычнай сілай у Польшчы. Спадар Камароўскі прыхільнік пашырэньня НАТО і неаднаразова выказваў задавальненьне з нагоды нядаўняга далучэньня да альянсу новых сябраў. У сувязі з гэтым, я папрасіў Браніслава Камароўскага пракамэнтаваць пазыцыю беларускага кіраўніка, які напярэдадні чарговы раз выказаўся супраць пашырэньня НАТО на ўсход. Гаворыць Браніслаў Камароўскі.
(Камароўскі: ) “Прэзыдэнт Лукашэнка ёсьць чалавекам з папярэдняй эпохі. Ён хіба забыўся на тое, што Варшаўскі блёк ужо не існуе, а НАТО – гэта ўжо ня тая арганізацыя, якая была да 1989 году. НАТО сёньня ня толькі нікому не пагражае, але ёсьць адзінай стабілізацыйнай сілай у сьвеце і асабліва ў Эўропе. І калі Лукашэнка хоча ўзмацняць вайсковае супрацоўніцтва з Расеяй у адказ на пашырэньне НАТО, дык гэта акурат ёсьць ідэя зь мінулай эпохі. Бо нават прэзыдэнт Пуцін ужо не ўспрымае НАТО як пагрозу, нягледзячы на тое, што Паўночна-атлянтычны блёк ужо перасёк мяжу былога СССР. Цяпер у склад НАТО ўваходзяць Літва, Латвія ды Эстонія і, як мне падаецца, у будучым да альянсу можа далучыцца Ўкраіна. Такім чынам, трэба папросту зьмяніць погляд на сьвет, на самога сябе і таксама на НАТО”.
(Карэспандэнт: ) “Калі, як Вы кажаце, нават прэзыдэнт Расеі Ўладзімір Пуцін зьмяніў сваё стаўленьне да НАТО, чаму, на Вашую думку, беларускі кіраўнік працягвае бачыць у НАТО ворага?”
(Камароўскі: ) “На маю думку, прэзыдэнт Лукашэнка папросту хоча бачыць навакольны сьвет як пагрозу Беларусі дзеля таго, каб не заўважаць іншых праблемаў, зьвязаных з адсутнасьцю дэмакратыі ва ўласнай краіне ці застоем у гаспадарцы. Калі ёсьць зьнешні вораг, значна лягчэй забывацца на ўласныя грахі, памылкі і праблемы. НАТО – ня вораг Беларусі. Папросту мы як сябры НАТО і прэзыдэнт Лукашэнка, безумоўна, не пасуем адно да аднаго”.
(Карэспандэнт: ) “Спадар Камароўскі, вы згадалі таксама пра тое, што Ўкраіна можа ў будучым далучыцца да НАТО. А ці мае, на Вашую думку, такі шанец Беларусь таксама, зразумела, у будучым?”
(Камароўскі: ) “Паўночна-атлянтычны блёк застаецца арганізацыяй адкрытай, аднак сяброўства ў ім заўсёды залежыць ад узроўню дэмакратыі і ад волі самога народу. Калі б Беларусь хацела далучыцца да НАТО, была адпаведна падрыхтаваная, ў тым ліку і што тычыцца ўзроўню дэмакратыі, а таксама мадэрнізацыі ўзброеных сілаў, дык такая дэмакратычная і незалежная Беларусь магла б разьлічваць на падтрымку свайго жаданьня далучыцца да НАТО. Але такое жаданьне павінна зыходзіць ад народу, ад дзяржавы. Звонку такія рэчы не належыць падказваць”.
