Пра тое, ці павінны чыноўнікі мець дарагія пэрсанальныя службовыя аўтамабілі, меркаваньні мінакоў падзяліліся.
(Карэспандэнтка: ) “Ці могуць айчынныя чыноўнікі езьдзіць на дарагіх замежных аўтамабілях і ці спрыяе гэта аўтарытэту ўлады?”
(Юнак: ) “Аўтарытэту яму не прыбавіць тое, што ён будзе езьдзіць на джыпе, а не на “Волзе”. Супраць я нічога ня маю, але я і ня за”.
(Спадар: ) “Думаю, што лепш узяць адну добрую машыну, чым дзесяць дрэнных. Замежная — яна колькі пройдзе? Гадоў дзесяць, а “Волга” два-тры — і ўсё”.
(Юначка: ) “Гэтыя машыны будуць купленыя на грошы народу, і я думаю, што ёсьць дастаткова добрыя машыны, да прыкладу, новыя мадэлі “Волгі”, на якіх могуць езьдзіць чыноўнікі. Таму я думаю, што можна абысьціся й без дарагіх аўтамабіляў”.
(Спадар: ) “Ну, якая розьніца, на якіх аўтамабілях яны будуць езьдзіць! Галоўнае, каб добра вырашалі свае пытаньні”.
(Спадарыня: ) “Я лічу, што яны не павінныя езьдзіць на дарагіх замежных аўтамабілях. Хоць у нас, калі падысьці да “чырвонага дому”, там аўтамабілі з сэрыі “МІ” стаяць толькі зь ліку апошніх мадэляў “Вольва”.
(Карэспандэнтка: ) “Ці спрыяе гэта аўтарытэту ўлады?”
(Спадарыня: ) “Я лічу, што не. Гэта, канечне, супраць нашых кіраўнікоў і нашых уладаў. Бо людзі ў нас жывуць небагата, калі й маюць машыны, то старэнькія, прыгнаныя з Эўропы. А кіраўнікі езьдзяць на шыкоўных аўтамабілях — канечне, людзям гэта непрыемна”.
Некаторыя людзі казалі, што супраць таго, каб чыноўнікі скарыстоўвалі бюджэтныя грошы на дарагія пэрсанальныя аўтамабілі, але перакананыя, што ў Беларусі гэтая практыка будзе доўжыцца яшчэ некаторы час.
(Карэспандэнтка: ) “Ці могуць айчынныя чыноўнікі езьдзіць на дарагіх замежных аўтамабілях і ці спрыяе гэта аўтарытэту ўлады?”
(Спадарыня: ) “Не, не спрыяе абсалютна. Але мы нічога ня зьменім, калі нават нешта скажам: усё гэта за наш кошт, але яны езьдзілі, езьдзяць і будуць езьдзіць. Як жылі добра, так і будуць жыць, а мы — існаваць”.
(Спадар: ) “Тут гавары колькі хочаш, а ўсё застанецца па-ранейшаму: як езьдзілі, так і будуць езьдзіць. Тут трэба ўсё мяняць, але мы да эўрапейскіх стандартаў яшчэ не дарасьлі”.
(Юначка: ) “Простым людзям вельмі непрыемна, калі яны разьяжджаюць на дарагіх аўтамабілях, гэтак паказваюць, што яны вышэйшая кляса над іншымі людзьмі. Прычым, робяць гэта за нашыя грошы”.
(Юнак: ) “Мы ўсё роўна ня можам нічога зрабіць, але трэба, каб наш народ сабраўся разам, як у Грузіі, і даў па вуху гэтым чыноўнікам”.
(Юнак: ) “Нячыстыя на лапу чыноўнікі — бо кантроль аднаго зловіць, а іншых не, і ён карыстаецца людзкімі грашыма, маёмасьцю, тымі ж аўтамабілямі — што пра гэта можна казаць? Без камэнтароў”.
Гэткія былі выказваньні людзей на вуліцах Менску пра магчымасьць для айчынных чыноўнікаў мець дарагі пэрсанальны аўтамабіль.
