Вайскоўцы завуць такія манэўры штабной трэніроўкай, але ў іх возьмуць удзел рэальныя баявыя самалёты, таму хутчэй гэта будуць ўсё ж манэўры з элемэнтам штабной працы. Беларускія самалёты паляцяць у Расею, дзе выканаюць пэўныя ролі, а ў Беларусь прыляцяць расейскія зьнішчальнікі, зь якімі тут згодна з прыдуманым сюжэтам будуць працаваць беларускія вайсковыя дыспэчары. Сюжэты такія: нібыта паветраную мяжу краінаў парушыў чужы самалёт, і яго трэба зьнішчыць альбо прымусіць сесьці. Другі сюжэт: беларускі ці расейскі самалёт нібыта захоплены тэрарыстам, які спрабуе прарвацца за межы дзьвюх краінаў.
Літаральна два тыдні таму на поўначы ад Беларусі пачалі патрульныя палёты чатыры самалёты бэльгійскіх ваенна-паветраных сілаў, якія ўключаныя ў сілы НАТО. Але беларускія вайскоўцы ня кажуць, каго яны маюць на ўвазе пад умоўным парушальнікам. І ўвогуле наўпрост сувязь манэўраў са зьяўленьнем побач сілаў НАТО не прызнаецца.
(Афіцэр: ) “Гэта ў прынцыпе плянавы працэс. Сёньняшняя трэніроўка была заплянаваная на красавік, і якраз у гэты час адбылося ўступленьне прыбалтыйскіх краінаў у НАТО”, — паведаміў адзін з афіцэраў штабу ваенна-паветраных сілаў Беларусі.
У манэўрах бяруць удзел толькі часткі паўночнага і заходне-паўночнага апэратыўных кірункаў, і гэта дае арыенцір у пошуках умоўнага праціўніка для беларускіх лётчыкаў і зэнітчыкаў.
За савецкім часам супрацьстаяньне паветраных сілаў НАТО і Савецкага Саюзу часта вылівалася ў зьбіцьцё рэальных самалётаў, якія з розных прычынаў парушалі межы краінаў. Самы вядомы такі выпадак — зьбіцьцё саветамі паўднёва-карэйскага пасажырскага “Боінга” над Ахоцкім морам напачатку 1980-х гадоў, тады загінула больш як дзьвесьце чалавек. Час ад часу здараліся і ўгоны самалётаў. Пры канцы 1970-х савецкі лейтэнант Бяленка ўгнаў у ЗША найноўшы самалёт МІГ-25 і папрасіў у Амэрыцы палітычнага прытулку. Праз колькі гадоў Бяленка быў забіты пры нявысьветленых абставінах, ёсьць вэрсія, што зь ім паквіталася КГБ.
