Паводле афіцыйнай вэрсіі, гэта робіцца дзеля эканоміі бюджэтных сродкаў, аднак рэдакцыйны калектыў перакананы, што гэтак званая рэарганізацыя адбылася паводле ідэялягічных меркаваньняў.
Рэарганізацыя распачалася пасьля загаду аб пераводзе “Бярозкі” ў склад холдынгу “Літаратура і Мастацтва”. Але ў абарону выданьня выступілі літаратары й дзеячы культуры, якія накіравалі ліст пратэсту ўраду і ў Міністэрства інфармацыі.
Адказам высокіх чыноўнікаў стаўся перавод часапісу ў падпарадкаваньне “Настаўніцкай газэце”, што не зьмяніла сутнасьці – “Бярозка” пазбаўляецца юрыдычных правоў, а рэдакцыйны калектыў звальняецца ў поўным складзе. Сярод іншых – Алесь Наварыч, які ёсьць сёлетнім намінантам прэміі Аляксандра Лукашэнкі.
Супрацоўнікі ня верыць у эканамічную падставу гэтых зьменаў і мяркуюць, што сапраўднай прычынай ёсьць рэдакцыйная палітыка “Бярозкі”, скіраваная на прапаганду не дзяржаўнай ідэялёгіі, а беларускасьці.
Вось што ў інтэрвію Радыё Свабода сказаў намесьнік рэдактара Ўладзімер Мароз.
(Мароз: ) “У нас палітыка адна – выхоўваць у дзяцей любоў да нашай роднай Беларусі й усё. Ці гэта наступ на ўсё беларускае? Можна згадаць і ліквідацыю выдавецтва “Юнацтва”. Дзіцячая рэдакцыя на радыё закрытая. Гуманітарны ліцэй разагнаны. Можа гэта ідзе ў адным шэрагу?”
“Бярозка” – адзін зь нямногіх беларускамоўных дзіцячых часапісаў. Сёлета яму спаўняецца 80 гадоў. За гэты час супрацоўнікамі й аўтарамі выданьня былі многія вядомыя ў краіне, пісьменьнікі й паэты. Да прыкладу, Рыгор Барадулін, Уладзімер Ягоўдзік, Адам Глёбус.
Вось што ў інтэрвію Радыё Свабода сказаў былы супрацоўнік часапіса, паэт Алесь Бадак.
(Бадак: ) “Гэты часапіс вельмі патрэбны, бо гэта адзінае літаратурнае выданьне, якое друкуе дзіцячую літаратуру й літаратуру для падлеткаў. Яе ў нас і так мала, а калі ня будзе “Бярозкі”, то я баюся, што яна зусім зьнікне”.
Гаварыў Алесь Бадак. Рэдакцыйны калектыў “Бярозкі” накіраваў ліст пратэсту супраць свайго звальненьня на адрас Міністэрства інфармацыі й там, нібыта, паабяцалі паклапаціцца пра далейшы лёс супрацоўнікаў.
Аднак пра сапраўднае стаўленьне да былых выдаўцоў “Бярозкі” сьведчыць такі факт: у часе ліквідацыі рэдакцыя падрыхтавала чарговы, трэці нумар “Бярозкі”. Але толькі ў друкарні калектыву паведамілі, што яшчэ раней да друку быў прыняты гэты ж самы нумар часопіса, але за аўтарствам “Настаўніцкай газэты”.
