Насельніцтва вёскі Кублічы складае усяго некалькі соцень чалавек, і тамтэйшая бібліятэка месьціцца ў будынку сельсавету. Тэлефона ў кубліцкай бібліятэцы няма, таму па камэнтар да гэтае падзеі – зьяўленьня на Віцебшчыне першай бібліятэкі імя Васіля Быкава – давялося зьвярнуцца да дырэктаркі Вушацкай раённай бібліятэчнай сыстэмы Ірыны Ўрбан. Аднак спадарыня Ірына пра тое нават ня ведала.
(Урбан: ) “Ня ведаю! Было ў нас рашэньне райвыканкаму, пасьля дасылалі яго ў Віцебск і ў Міністэрства культуры, а як там далей – ня ведаю. Нічога сказаць не магу!”
(Карэспандэнтка: ) “А тут, у Вушачах, назваць бібліятэку імем Васіля Быкава ці не было прапановы?”
(Урбан: ) “Наша бібліятэка ўжо мае імя – Еўдакіі Лось. А Бычкі, вёска тая, дзе нарадзіўся Васіль Уладзімеравіч, месьціцца за 5 кілямэтраў ад Кублічаў, і таму вырашылі даць той бібліятэцы ягонае імя. Там 8 тысяч кніг у фондах. Ёсьць у раёне бібліятэкі, дзе усяго па дзьвесьце чытачоў, а там – каля чатырохсот. Усё ў нас наладжваецца да 80-годзьдзя Васіля Быкава.”
Паводле спадарыні Ўрбан, землякі пісьменьніка гавораць, што яшчэ няблага было б стварыць музэй у Кубліцкай сярэдняй школе, дзе вучыўся Васіль Быкаў, ды таксама даць гэтай школе ягонае імя.
З такімі ж прапановамі зьвярталіся да абласных уладаў і сябры віцебскай абласной Рады ТБМ. Гаворыць старшыня рады Іосіф Навумчык.
(Навумчык: ) “Мы прапаноўвалі і школу ў Кублічах назваць імем Быкава, і бібліятэку, толькі іншую… Але што ж зробіш! Прапаноўвалі і музэй – ня толькі ў Бычках, але і ў Віцебску, і вуліцу ў Віцебску прапаноўвалі назваць ягоным імем… Але ж нічога гэтага не зацьвердзілі!”
Усяго віцебскія сябры ТБМ выказалі каля двух дзясяткаў прапановаў па ўшанаваньні памяці Васіля Быкава ды падрыхтоўцы сьвяткаваньня ягоных 80-х угодкаў. Аднак, на думку спадара Навумчыка, улады падтрымалі хіба толькі чвэртую частку гэтых прапановаў: паабяцалі выдаткаваць грошы на стварэньне музэя ў вёсцы Бычкі, на дзьве мэмарыяльныя дошкі, а таксама пагадзіліся правесьці літаратурнае сьвята ў Вушачах ды навуковую канфэрэнцыю у Віцебску.
Каб не падпадаць пад залежнасьць ад дзяржаўнага фінансаваньня, віцебская рада ТБМ мяркуе сабраць сродкі на правядзеньне мастацкага пленэру на Вушаччыне ды правесьці яшчэ колькі імпрэзаў уласнымі сіламі.
