Лінкі ўнівэрсальнага доступу

НЕКАТОРЫЯ ПРАДПРЫЕМСТВЫ ПОЛЬШЧЫ БЫЛІ ВЫМУШАНЫЯ СКАРАЦІЦЬ АБ’ЁМЫ ВЫТВОРЧАСЬЦІ


Аляксей Дзікавіцкі, Варшава

Польшча атрымлівае з Расеі прыкладна 55% неабходнага ёй газу, прычым гэты газ амаль цалкам ідзе праз тэрыторыю Беларусі. Таму ад самога ранку ў чацьвер беларуска-расейскі газавы канфлікт – у цэнтры ўвагі польскіх сродкаў масавай інфармацыі.

Прадстаўнікі ўраду запэўнілі, што газ, у любым выпадку, будзе ў кватэрах, школах і мэдычных установах.

Кіраўніцтва нацыянальнай нафтагазавай кампаніі аб’явіла пра намер павялічыць узровень дабычы газу ўнутры краіны. На сёньняшні дзень у Польшчы дабываецца прыкладна 30% ад усяго неабходнага краіне аб’ёму блакітнага паліва.

Акрамя гэтага, польскі ўрад тэрмінова распачаў перамовы з нарвэскай фірмай Statoil, каб павялічыць пастаўкі газу з Нарвэгіі. Але, нягледзячы на ўсе гэтыя захады, без расейскага газу Польшчы цяжка будзе абысьціся.

Гаворыць віцэ-міністар гаспадаркі Яцэк Пяхота.

(Пяхота: ) “Калі б такая сытуацыя ўтрымалася цягам 20-30 дзён, то краіна, напэўна, адчула б недахоп газу”.

Аднак, як адзначыў Яцэк Пехота яшчэ раніцай, Беларусь будзе вымушаная пайсьці на саступкі “Газпрому”, што ў выніку прывядзе да аднаўленьня транзыту газу ў Польшчу.

(Пяхота: ) “Беларусь цяпер знаходзіцца ў значна горшай сытуацыі, чым Польшча. Бо гэтая краіна залежная ад расейскага газу практычна цалкам. Мы можам забясьпечыць газ у кватэрах, грамадзкіх установах і мусім ашчаджаць толькі ў выпадку вялікіх прадпрыемстваў хімічнай прамысловасьці. Пры такой залежнасьці Беларусь будзе вымушаная пайсьці на кампраміс з “Газпромам”. Польшча, прынамсі, мае магчымасьці атрымліваць газ зь іншых крыніцаў”.

Польская апазыцыя, аднак, вінаваціць цяперашні посткамуністычны ўрад Лешка Мілера ў тым, што ён, у адрозьненьні ад папярэдняга, правага кабінэту міністраў, не займаецца ўзмацненьнем энэргетычнай бясьпекі краіны. Гаворыць лідэр найвялікшай апазыцыйнай партыі “Грамадзянская плятформа” Ян Ракіта:

(Ракіта: ) “У тым, што Польшча ў любы момант можа застацца бяз газу, вінаваты не “Газпром” і не беларускія ўлады, а, на жаль, прэм’ер Лешэк Мілер. Ён не схацеў працягваць распачатыя папярэднім прэм’ерам перамовы з Нарвэгіяй і паставіў энэргетычную бясьпеку краіны ў залежнасьць ад расейскага газу. Гэта робіцца на карысьць алігархаў, якія працуюць у сфэры энэргетыкі”.

Паводле словаў Яна Ракіты, наступны польскі ўрад, які, хутчэй за ўсё, створаць правыя, зробіць усё, каб пазбавіцца ад небясьпечнай залежнасьці толькі ад аднаго дастаўца газу.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG