Аксана Новікава адмовілася адказваць на пытаньні судзьдзі. Яна патлумачыла, што гэта, на яе думку, ўсё роўна не паўплывае на прысуд, бо яе і так аштрафуюць за правядзеньне пікету. Нагадаем, Аксана напярэдадні Новага году перад будынкам Фрунзенскага суду Менску стала з плякатам: “Нам патрэбны суд прысяжных”. Яе затрымалі і склалі пратакол за правядзеньне не дазволенага ўладамі пікету. Суд пакараў Аксану штрафам на 200 мінімальных заробкаў (гэта каля 1 600 даляраў).
Два тыдні таму Савецкі суд Менску пакараў Аксану Новікаву за арганізацыю моладзевай акцыі 24 лістапада, прысьвечанай гадавіне рэфэрэндуму 1996 году, штрафам 4 375 000 рублёў. Аксана Новікава нідзе не працуе і мае маленькую дачку. Вось як яна пракамэнтавала гэтыя прысуды Радыё Свабода:
(Новікава: ) “Літаральна на днях мне прысудзілі штраф 4 375 000 рублёў, а сёньня чарговы штраф — 3 500 000 рублёў. Магчыма, яны ўсур’ёз лічаць, што я аддам гэтыя грошы, улічваючы сярэдні заробак у Беларусі, тое, што я нідзе не працую і ў мяне маленькае дзіця. Я лічу, што судзьдзям абсалютна ўсё роўна, выканаю я гэты прысуд ці не”.
Крымінальную справу Аксаны Новікавай за абразу Аляксандра Лукашэнкі Фрунзенскі суд Менску перадаў у амністыйную камісію. Ня выключана, што на рашэньне камісіі паўплываюць адміністрацыйныя прысуды. У такім разе Аксану Новікаву могуць на два гады накіраваць у жаночую калёнію.
