Лінкі ўнівэрсальнага доступу

ДЭПУТАТА РАЙСАВЕТУ АД АПАЗЫЦЫЙНАЙ ПАРТЫІ КАМУНІСТАЎ СКАРАЦІЛІ НА ПРАЦЫ


Сяргей А страўцоў, Горадня

Аляксандру Пудаўкіну 38 гадоў, пяць апошніх ён у складзе партыі камуністаў. Жыве дэпутат у вёсцы Луна, дзе працаваў землеўпараднікам ад райвыканкаму. Дэпутаты райсавету лёгка згадзіліся даць дазвол на ягонае звальненьне, супраць быў толькі Алесь Зарэмбюк, дарэчы – адзін зь лідэраў новай кааліцыі “Маладая Беларусь”.

(Зарэмбюк: ) “У нашым савеце яшчэ ёсьць дэпутаты ад Партыі камуністаў беларускай, але гэты чалавек вельмі не падобны на іншых дэпутатаў-камуністаў. Ён заўсёды актыўны, ён заўсёды задае балючыя, хвалюючыя пытаньні”.

Беспрацоўны дэпутат сказаў мне па тэлефоне, што на апошняй сэсіі 16 студзеня начальства яго заспакоіла: маўляў, будзеш паўгоду атрымліваць дапамогу, а потым якая-небудзь праца знойдзецца.

(Пудаўкін: ) “Я адразу вам скажу, што гэта чыста палітычны заказ. Паколькі мы разам з жыхарамі вельмі актыўна адстойваем свае інтарэсы”.

Аляксандар Пудаўкін у лістападзе дамогся, каб не закрылі Луненскі шпіталь, на якім раённыя ўлады вырашылі сэканоміць. У 28 вёсках свае подпісы пад пратэстам супраць закрыцьця шпіталя паставілі больш за адну тысячу жыхароў. Пра гэта дэпутат напісаў у артыкуле “Шпіталь вымагае абароны” ў партыйнай газэце “Товарищ”. Паводле дэпутата, гэты артыкул не спадабаўся старшыні райвыканкаму.

Старшыня раённага савету Георгі Каробка адмаўляе палітычныя матывы звальненьня Аляксандра Пудаўкіна:

(Каробка: ) “Тут абсалютна ніякіх палітычных матываў няма, таму што ў нас ад партыі камуністаў чатыры ці пяць чалавек у раённым савеце. Гэта проста чыстая выпадковасьць, што служба рэфармуецца, у якой ён быў пры сельскім савеце”.

Сп. Каробка сказаў мне, што паедзе сёньня ў Луна на сэсію сельсавету, дэпутатам якога таксама адначасова зьяўляецца Аляксандар Пудаўкін. Георгі Каробка сказаў таксама, што на месцы паспрабуе працаўладкаваць сп. Пудаўкіна.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG