Рабочы Ўладзімер Карпека доўгі час працаваў на Бобрскім сьпірзаводзе, але грошай за сваю працу не атрымліваў. Кіраўніцтва прадпрыемства казала, што завод толькі аднаўляецца, сваёй прадукцыі не вырабляе, таму й няма грошай на зарплату. У выніку спадар Карпека звольніўся і падаў пазоў у суд з патрабаваньнем выплаціць яму каля 2 мільёнаў рублёў запазычанасьці. А напярэдадні Новага году рабочы даведаўся, што іншым ягоным калегам пачалі выплачваць невялікія сумы.
30 сьнежня Ўладзімер Карпека прыйшоў у кабінэт да дырэктара заводу Тамаза Гаргадзэ і запатрабаваў сваю зарплату. Той плаціць адмовіўся, і тады Карпека абліў сябе і дырэктара бэнзынам і падпаліў. Іншыя рабочыя, што былі ў гэты час у дырэктарскім кабінэце, зьбілі зь іх полымя ды выклікалі пажарных і хуткую дапамогу. Абодва пацярпелыя з апёкамі дастаўленыя ў Крупскі раённы шпіталь.
Загадчык аддзяленьня хірургіі Генадзь Паўлюкевіч паведаміў Беларускай Свабодзе, што стан здароўся Ўладзімера Карпекі і Тамаза Гаргадзэ здавальняючы й пагрозы іх жыцьцю няма. Раённы пракурор Іван Дашук цяпер праводзіць у гэтай справе праверку й не выключае, што будзе заведзеная крымінальная справа.
Былы дырэктар сьпіртзаводу Канстанцін Раманюк вінаватым у гэтым здарэньні лічыць Тамаза Гаргадзэ, які цягам амаль двух гадоў фактычна не выплачваў працаўнікам зарплату:
(Раманюк: ) “Сам гаспадар шыкуе на шырокую ногу, прычым дэманстратыўна паказвае, які ён багаты, а людзі па два гады й больш без зарплаты. Калі ёсьць сям’я і ёсьць у сям’і гаспадар, мужчына — ён павінен сям’ю ўтрымліваць. А ён ня можа гэтага зрабіць, хаця й зарабіў, гэта адчай проста. У кожнага свой характар, у кожнага свая псыхіка, хто як. У Карпекі двое дзяцей, і ў іх нешта ня ладзіцца са здароўем. А грошай няма, і ніхто не дае. А быццам бы працаваў і зарабіў”.
Гэта ня першы скандал, зьвязаны зь імем Тамаза Гаргадзэ. Увесну сёлета Дэпартамэнт фінансавых расьсьледаваньняў Камітэту дзяржкантролю завёў супраць кіраўніцтва прадпрыемства крымінальную справу за выраб сьпірту без адпаведнай ліцэнзіі.