Віленская вучнёўская сэсія ліцэістаў пачалася ўчора і працягнецца два тыдні. Заняткі адбываюцца у памяшканьні Віленскага ліцэю. Сёньня адбылася сустрэча калектыву Ліцэю з дырэктарам Інстытуту міжнародных дачыненьняў Літвы Раймандасам Лапатой, заснавальнікам Беларускага інстытуту – недзяржаўнай арганізацыі, якая апекавалася арганізацыяй візыту Ліцэю, і зь сябрам Сойму Літвы Вацлавам Станкевічам, дэпутатам ад партыі сацыял-лібэралаў. Ён – старшыня палямэнцкай камісіі ў справах НАТО, сябра дэлегацыі Парлямэнцкай Асамблеі Рады Эўропы, а таксама – сябра парлямэнцкай групы сувязяў зь Вярхоўным Саветам Беларусі 13-га скліканьня і дэмакратычнымі сіламі Беларусі.
Парлямэнтар адзначыў, што выказвалася незадаволенасьць беларускіх дыпляматаў з нагоды таго, што Літва дапамагае Беларускаму Ліцэю.
(В.Станкевіч: ) “Ня толькі інтэлігенцыя Літвы, але і ўвогуле, і ўрад Літвы неабыякава ставіцца да справы ліцэю. Ўсё ж такі мы добрыя суседзі, і Беларусь для нас – вялікі блізкі сусед, і мы не маглі не зьвяртаць увагі, што, на жаль, так сталася зь Ліцэем у Беларусі. І таму ў гэтай справе ўдзельнічае ня толькі інтэлігенцыя Літвы, але і ўрад Літвы, і я гэта хачу сказаць, каб ведалі ўсе. Я гэтым як чалец парлямэнту Літвы вельмі ганаруся.
Наконт беларускай амбасады. Асабіста мне нічога не было сказана, але, як я чуў ад нашых дыпляматаў, з боку беларускай амбасады у Літве была такая пагроза, што калі вы будзеце штосьці рабіць наконт Ліцэю, так мы зачынім вашыя літоўскія школы ў Беларусі. Вось гэта мне даводзілася чуць ад нашых дыпляматаў”.
Прыезд калектыву Ліцэю у Вільню стаўся магчымым найперш дзякуючы недзяржаўным арганізацыям, – Беларускаму інстытуту, віленскай беларускай грамадзе. Літва як дэмакратычная краіна ня можа адмовіць ў падтрымцы навучальнай установе:
(В.Станкевіч: ) “Абавязкова будзем дапамагаць. Мы ня лічым, што гэта справа палітычная. Гэта ж дэеці. Мы хочам толькі дабра. Мы хочам, каб у Беларусі была дэмакратыя. Каб краіна была прагназаваная для нас. І мы будзем дапамагаць дзецям, мы будзем дапамагаць настаўнікам, мы будзем рабіць усё магчымае, каб гучала беларуская мова на тэрыторыі Беларусі”.
