Пра значнасьць уплыву расейскай палітыкі на Беларусь мае суразмоўцы выказвалі розныя меркаваньні. Адказы на пытаньне найчасьцей былі такія:
(Карэспандэнтка: ) “Ці паўплываюць выбары ў Расеі на становішча ў Беларусі”.
(Спадарыня: ) “Думаю, што абавязкова. Па-першае, у нас шмат эканамічных зьвязкаў, палітычных. Таму, у залежнасьці ад таго, каго выберуць, будзе ўплыў і на нашую палітыку, і эканамічнае становішча”.
(Спадар: ) “Які будзе парлямэнт у Расеі такія, на маю думку, будуць і адносіны”.
(Спадар: ) “Калі там сапраўды нейкая партыя пачне ўплываць на тое становішча, у якім мы жывем, праз Эўразьвяз і іншым чынам, дык гэта будзе добра”.
(Спадар: ) “Канечне, паўплываюць, бо прэзыдэнт Лукашэнка й Пуцін, яны разам працуюць. Я думаю, што будзе толк з гэтых выбараў”.
(Юначка: ) “Я думаю, што выбары тут ні пры чым: што вырашыць Уладзімер Уладзімеравіч, тое й будзе. Бо свабоды ў Расеі становіцца ўсё менш, а прэзыдэнт уплывае ня толькі на палітыку, але й эканоміку і ўсе астатнія адносіны. Шмат што залежыць і ад Лукашэнкі, бо ягоныя паводзіны непрадказальныя”.
(Юнак: ) “Цяжка сказаць, але пэўна так. Пэўна, ёсьць нейкія зьвязкі паміж нашым кіраўніцтвам і расейскім. Хацелася бы, каб міліцыянтаў на вуліцы менш было вечарамі”.
(Спадарыня: ) “Паглядзім, што будзе ў Расеі. У нас будзе тое ж самае, а раней ці пазьней — гэта справа часу”.
Сярод мінакоў гэтаксама былі людзі, якія ня ведалі, што адказаць на пытаньне, альбо не жадалі згадваць Расеі ў якасьці краіны, здольнай паўплываць на становішча ў Беларусі.
(Карэспандэнтка: ) “Ці паўплываюць выбары ў Расеі на становішча ў Беларусі?”
(Юнак: ) “У Беларусі? Цяжка сказаць. Магчыма паўплываюць, але я ня ведаю, гэта будзе лепш ці горш для нас. Нават не магу дакладна сказаць. Прабачце”.
(Спадарыня: ) “Я думаю, што не паўплываюць. Гэта іхныя ўнутраныя справы. А Беларусь — яна ўсё аддаляецца, аддаляецца і аддаляецца ад Расеі”.
(Спадар: ) “Кіраваць нашай краінай з боку Расеі, фактычна, немагчыма. Я думаю, што толькі выбары прэзыдэнта могуць паўплываць на становішча паміж краінамі”.
(Спадарыня: ) “Залежыць гэта ўсё ад таго, хто патрапіць у іхны парлямэнт. Цяпер там вялікая барацьба ідзе за гэтыя дэпутацкія мандаты. Але ж я думаю, што пераменаў будзе ня шмат, мала. Думаю, што пакуль той “саюз” здарыцца — шмат вады сплыве”.
(Юнак: ) “Я лічу, што не паўплываюць. Я лічу, што мы незалежныя ад Расеі”.
(Спадарыня: ) “Я лічу, што выбары ў Расеі не паўплываюць на становішча ў Беларусі. Расея ёсьць Расея, а Беларусь ёсьць Беларусь. І ўвогуле я не хачу, каб Расея і Беларусь аб’ядналіся”.
Гэта былі адказы мінакоў на вуліцах Менску на пытаньне, ці паўплываюць вынікі расейскіх выбараў на Беларусь?
