Толькі адна з маіх суразмоўніц прызналася, што была ахвярай фізычнага гвалту. Пры гэтым большасьць апытаных лічаць, што беларускія жанчыны вельмі часта становяцца ахвярамі гвалту:
(Сталая жанчына: ) “Не, дзякуй богу, не было. Але думаю, гвалт ужываюць часта. Жанчыны даверлівыя, распазнаць нягодніка, відаць, вельмі складана недасьведчанаму чыстаму чалавеку”.
(Дзяўчына: ) “Не, на шчасьце, не”.
(Карэспандэнт: ) “Скажыце, на вашую думку, беларускія жанчыны часта становяцца ахвярамі гвалту?”
(Дзяўчына: ) “Як і жанчыны ўсіх краінаў. Гэта справа выпадку, але ня думаю, што беларускія жанчыны больш за іншых церпяць ад гвалту. Калі гаварыць пра маральны гвалт, гэта могуць быць ня толькі жанчыны, але й дзеці, падлеткі, юнакі. Усе яны могуць быць ахвярамі гвалту”.
(Дзяўчына: ) “Не, я ахвярай гвалту не была. Але жанчыны часта робяцца ахвярамі гвалту. Калі лічыць, што гвалт — гэта ня толькі фізычнае ўзьдзеяньне. Эканамічны гвалт, сацыяльны — мы можам сустрэць гэта нават на вуліцах. Таму, я думаю, што гэта сапраўды праблема для нашага часу”.
(Жанчына: ) “Думаю, што часта. Чула, як знаёмыя распавядалі. Але многія баяцца распавядаць. Часта чула і расповеды, і намёкі. У асноўным так — ахвяры баяцца пра гэта казаць”.
(Дзяўчына: ) “Думаю, што беларускія жанчыны не адчуваюць гвалту ў поўным сэнсе гэтага слова. Бо ў нас заўсёды спрабуюць станавіцца на бок жанчыны. І калі жанчыне дрэнна, яна заўсёды можа зьвярнуцца ў праваахоўчыя органы ці органы аховы здароўя”.
(Маладая жанчына: ) “Так, часта такое бывае. І са мной было, і з маімі знаёмымі, сваякамі, калегамі па працы”.
(Дзяўчына: ) “Я думаю, што даволі часта. Мая сяброўка гэта спазнала. І ўсё гэта вельмі цяжка адбіваецца на жыцьці чалавека”.
Гэткія былі адказы выпадковых мінакоў на пытаньне “Ці часта жанчыны робяцца ахвярамі гвалту?”