Паведамляецца, што новая партыя будзе фармавацца на падмурку моладзевай арганізацыі “Грамадзянскі форум”, якой кіруе Навасяд. Паводле яго, новая партыя плянуе ўзяць удзел у парляманцкіх выбарах.
Нагадаем, што ў свой час Уладзімер Навасяд быў сябрам кіраўніцтва Аб’яднанай грамадзянскай партыі, але прыпыніў сяброўства ў АГП, калі балятаваўся ў цяперашні склад Палаты прадстаўнікоў у 2000 годзе. АГП байкатавала тыя выбары.
Калі новая партыя і будзе створаная, невядома, ці будзе яна зарэгістраваная. Апошнім часам рэгістрацыя новай партыі – гэта надзвычай складаная справа. Днямі Міністэрства юстыцыі Беларусі адмовіла ў рэгістрацыі арганізацыі "Маладыя сацыял-дэмакраты". Рашэньне аб адмове ў рэгістрацыі прынятае на падставе заключэньня дзяржаўнай камісіі па рэгістрацыі (перарэгістрацыі) палітычных партыяў і грамадзкіх аб'яднаньняў.
У адмове Мінюсту фігуруюць некалькі прычынаў: нязгода з задачамі і мэтадамі арганізацыі, адсутнасьць іншых умоваў сяброўства ў арганізацыі, апрача згоды са статутам, наяўнасьць у арганізацыі двух кіруючых органаў, а таксама заўвагі да пратаколу зьезду.
Гэта была ўжо другая спроба арганізацыі атрымаць легальны статус. Першая была зробленая ў 2001 годзе. "Маладыя сацыял-дэмакраты" ўжо зьвярнуліся ў Вярхоўны суд з зыскам аб скасаваньні рашэньня Мінюсту.