Перапеўку вядомых песьняў папулярных выканаўцаў у музычным асяродку называюць трыб’ютам, альбо прысьвячэньнем. Трыб’ют гурту “NRM” складае 21 песьня, кожную зь іх выконвае асобны гурт. Прычым, бальшыня гэтых калектываў па-беларуску засьпявала ўпершыню. Усе яны ўзялі ўдзел у прэзэнтацыі альбому. Гаворыць адзін з арганізатараў імпрэзы, лідэр грамадзкага аб’яднаньня Беларуская музычная альтэрнатыва Віталь Супрановіч:
(Супрановіч: ) “Будзе выступаць 21 гурт. Да прыкладу, гурт “PartyZone” прасьпявае “Партызанскую”, “Краскі” з “Палацам” выканаюць “Тры чарапахі”. А скончыцца канцэрт песьняй “Паветраны шар”. Граць будзе “NRM”, а сьпяваць — вакалісты іншых гуртоў. Паколькі была вельмі вялікая цікавасьць, будзе працяг трыб’юту. Да прыкладу, “Нэйрадзюбэль” гатовы запісаць “Ла-ла-ла”. На другім дыску будуць таксама й замежныя гурты, якія не пасьпелі запісацца гэтым разам”.
У гісторыі сучаснай беларускай музыкі гэта толькі трэці выпадак, калі айчынныя гурты перапяваюць на свой лад вядомыя песьні папулярных выканаўцаў. Першыя прысьвячэньні былі адрасаваныя такім знаным калектывам як “Песьняры” і “Depeche Mode”. Гэткую ацэнку творчасьці “NRM” лідэр калектыву Лявон Вольскі пракамэнтаваў так:
(Вольскі: ) “Ну, гэта прыемна, што й з нашай творчасьцю разабраліся даволі сур’ёзна. Нам было цікава пабачыць, як яны гэта зробяць. Яны зрабілі гэта досыць нечакана, непадобна на нас, што прыемна. А мы працягваем творча расьці. У нас не такая краіна, каб супакоіцца й нічым больш не займацца. У нас ёсьць сталы раздражняльнік, які ўвесь час натхняе на творчасьць. Мы жывем ня ў самы лепшы час, затое ў нас усё добра з рок-н-ролам”.
Назву “Віза NRM” новы альбом атрымаў невыпадкова. Разам з кампакт-дыскам музыкі распаўсюдзілі ўмоўныя візы “NRM” для ахвотных пабываць у краіне Народная Рэспубліка Мроя. Сапраўднымі сувэнірамі гэтыя візы сталі толькі пасьля таго, як на іх уласнаручна паставілі свае подпісы ўдзельнікі гурту “NRM”.
