Удзельнікі пікету з запаленымі сьвечкамі ў руках расьцягнуліся ўздоўж Кастрычніцкай плошчы і больш за паўгадзіны паміналі тых грамадзянаў Беларусі, што загінулі, баронячы незалежнасьць сваёй краіны ад рук камуністычных і фашыстоўскіх акупантаў.
Паводле арганізатара акцыі лідэра Беларускай партыі свабоды Сяргея Высоцкага, такім чынам у дні, калі ў Беларусі праходзіць традыцыйнае памінаньне продкаў Дзяды, ён і ягоныя калегі хацелі аддаць пашану продкам і яшчэ раз нагадаць грамадзкасьці пра тыя ахвяры, якія панесла Беларусь у 20 стагодзьдзі. Акцыя на Кастрычніцкай плошчы не была санкцыянаваная ўладамі, але міліцыянты не перашкаджалі яе правядзеньню.
