Сёньня дваццаць трэці дзень галадоўкі Любові Санкевіч. Бабруйчанка трэці год змагаецца за аднаўленьне на працы на заводзе трактарных дэталяў і агрэгатаў і за справядлівае расьсьледаваньне ў дачыненьні да кіраўніцтва прадпрыемства, якое Любоў Санкевіч абвінавачвае ў злоўжываньнях. Яна зьвярталася ва ўсе магчымыя ўстановы з запытамі й цяпер дамагаецца дапамогі ад апошняй, як яна лічыць, інстанцыі — ад Аляксандра Лукашэнкі.
Учора пасьля затрыманьня насупраць будынку адміністрацыі Лукашэнкі Любоў Санкевіч з прычыны высокага ціску накіравалі ў менскі шпіталь №2. Ёй аказалі першую дапамогу і параілі зьяжджаць у Бабруйск ды зьвяртацца ў мясцовыя мэдычныя ўстановы. За час галадоўкі яе не наведвалі бабруйскія дактары, і толькі аднойчы мэдсястра пацікавілася, ці зрабіла жанчына ўсе належныя прышчэпкі і флюараграфію.
Любоў зьвярнулася да свайго кіраўніцтва (яна працуе касіркай у лазьні) з просьбай даць ёй адпачынак за свой кошт з прычыны пагаршэньня стану здароўя, аднак у гэтым ёй адмовілі. Жанчыне, якая галадуе, трэба выходзціь на працу ў суботу, і хаця сілаў не стае, Любоў вырашыла не ісьці насуперак патрабаваньняў адміністрацыі, бо асьцерагаецца звальненьня.
Спадарыня Санкевіч адмаўляецца спыніць галадоўку — нягледзячы на тое, што ранейшыя звароты ў адміністрацыю Аляксандра Лукашэнкі не далі вынікаў. Яна патрабуе хаця б пачаць новае расьсьледаваньне ў справе яе звальненьня. “Я не магу больш зносіць хлусьні чыноўнікаў”, — гаворыць жанчына.
Любоў Санкевіч таксама паведаміла Свабодзе, што дзьве яе партнэркі ў акцыях пратэсту, бабруйчанкі Яніна Аўсянік (яна таксама была ўчора затрыманая ў Менску) і Ева Ўсьцімчук, якія патрабуць ад уладаў справядлівасьці ў вырашэньні іх жыльлёвай праблемы, таксама рыхтуюцца да галадоўкі на знак пратэсту.