Сёньня да 14 галадоўшчыкаў далучыліся яшчэ 13. Яны абвесьцілі, што іхняя акцыя—бестэрміновая. Кіроўцы прыватнага “Радыётаксі 22222” патрабуюць, каб падатковая служба вярнула арыштаваныя таксоўкі, а таксама каб ім зноў дазволілі працаваць. З 20 кастрычніка міністар транспарту прыпыніў на адзін месяц дзеяньне ліцэнзіі на пасажырскія таксаперавозкі, якая выдадзена прадпрымальніку Мікалаю Аўтуховічу, у якога паводле дамовы працавалі кіроўцы.
Сёньня галоўны рэдактар незалежнай ваўкавыскай “Местной газеты” Андрэй Шэнтаровіч атрымаў папярэджаньне ад міністэрства інфармацыі.
Ён павінен цягам месяцу узгодніць юрыдычны адрас з ваўкавыскімі ўладамі, інакш газэту могуць закрыць. Спадар Шэнтаровіч схільны лічыць, што папярэджаньне выклікана тым, што выданьне актыўна падтрымлівае галадоўшчыкаў. “Местная газета” была зарэгістравана ў Смаргоні, а калі галоўны рэдактар перанес выданьне у Ваўкавыск, ён паведаміў мясцовым уладам пра зьмену адрасу, як таго вымагае закон.
