За два тыдні чарговай кампаніі гэтак званай добраахвотнай здачы зброі беларусы здалі ўжо больш за 300 адзінак зброі, рапартуе рэспубліканская міліцыя. Яшчэ прыкладна столькі ж зброі адабралі ў тых, хто парушаў правілы яе захоўваньня і рэгістрацыі. Такім чынам відавочна, што абвешчаная добраахвотная кампанія не такая і добраахвотная. Але нават не звяртаючы ўвагу на гэтыя акалічнасьці, паўстае пытаньне, адкуль у мірных беларусаў такія арсэналы, бо прыкладна да тысячы адзінак зброі зьбіраецца штогод?
Афіцыйныя крыніцы ў міліцыі кажуць, што большая частка добраахвотна зданай зброі і баепрыпаасаў належыць да часоў Другой усясьветнай вайны. Што гэтая зброя яшчэ можа страляць, запэўніў мяне Віктар Новікаў з прэсавай службы міністэрства ўнутраных справаў. Паводле яго, у Беларусі ёсьць майстры , якія знаходзяць і аднаўляюць вінтоўкі і нават кулямёты, якія праляжалі ў зямлі 50 гадоў.
Другой асноўная крыніцай папаўненьня беларускага незаконнага арсэналу ёсьць паляўнічыя стрэльбы, якія засталіся ад бацькоў ці дзядоў. Адноўчы нашчадкі знаходзяць іх у старой шафе ці на сутарэньні і паўстае пытаньне, што рабіць з вэтэранам паляваньня на дзікоў у хрушчоўскія ці брэжнеўскія часы? І вось добраахвотна здаюць. Прычым часта спадзяюцца на грашовую кампэнсацыю, а ім на гэта кажуць у міліцыі, што грошай яны наўрад ці дачакаюцца. Маўляў, радуйцеся, што вас не прыцягнуць да адказнасьці за незаконнае захаваньне . Па адмысловым тэлефоне даверу мне пацьвердзілі, што грашовай кампэнсацыі у часе гэтай кампаніі таксама ня будзе.
Што ж да баявой зброі ці гэтак званых паляўнічых стрэльбаў з наразнымі стваламі, то ў Беларусі прыняты закон “Аб зброі”, паводле якога яе наагул мець нельга, і тым, хто здасьць баявую зброю, якая была раней набытыя законным шляхам, гарантаваная кампэнсацыя.
У былога сьпікера Вярхоўнага Савета Мечыслава Грыба ўзялі некалькі адзінак баявой зброі, але кампэнсацыю гэтак і не сплацілі. Дарэчы, Мечыслаў
Грыб лічыць, што грамадзянін Беларусі мае права дзеля абароны ці ў іншых дазволеных законам мэтах валодаць і наразной зброяй.
(Грыб: ) “Калі чалавек мае зброю на законных падставах, якая зарэгістраваная – куля зарэгістраваная ў кулятэцы, гільза ў гільзатэцы – то такі чалавек ніколі яе не выкарыстае, бо гэта ўсё роўна, як пакінуць на месцы злачынства адбіткі пальцаў”.
Гэта было меркаваньне генэрала міліцыі ў адстаўцы Мечыслава Грыба на праблему валоданьня баявой зброяй, якую цяпер прымаюць ў органах міліцыі ад грамадзянаў.
