Напярэдадні нарады кіраўнікоў органаў бясьпекі краін СНД, якая пачалася ў Маскве ў гэтую пятніцу, КГБ Беларусі знайшоў у Менску патэнцыйнага тэрарыста — грамадзяніна Ярданіі Музаена Валіды Хусэйна Аль-Махамэда. Ва Ўкраіне ён атрымаў вышэйшую мэдычную адукацыю, але з прычыны прапаганды ідэяў тэрарызму ды экстрэмізму ўкраінскія ўлады далі спадару Хусэйну Аль-Махамэду два месяцы, каб пакінуць іх тэрыторыю.
Цяпер беларускі КГБ кажа, што ўкраінцы не паінфармавалі яго пра небясьпечнага замежніка. Але цікава тое, што ў Менск ярданец прыехаў у сьнежні 2001 году — праз тры месяцы пасьля тэрактаў у ЗША і пачатку міжнароднай кампаніі барацьбы з тэрарызмам. Нягледзячы на гэтую кампанію, Хусэйна Аль-Махамэда ня толькі пусьцілі на беларускую тэрыторыю з адпаведнай візай, але й залічылі асьпірантам Беларускай мэдычнай акадэміі для працягу пасьлядыплёмнай адукацыі на катэдры пэдыятрыі.
Паводле намесьніка начальніка ўправы КГБ па Менску і Менскай вобласьці Фёдара Котава, гэты асьпірант “займаўся тым, што актыўна прапагандаваў сярод беларускіх грамадзян вахабізм”. Сталічнай управе КГБ спатрэбілася амаль два гады, каб гэта выявіць. Супраць Хусэйна аль-Махамэда ўжылі “мяккую форму дэпартацыі” — тую самую, што й супраць менскага карэспандэнта расейскага тэлеканалу НТВ Паўла Селіна: забаранілі ўезд на тэрыторыю Беларусі цягам пяці гадоў і прапанавалі пакінуць яе ў наступныя суткі.
Хаця спачатку зьявілася інфармацыя, што ярданец паедзе ў Польшчу, потым прэсавая група менскай управы КГБ паведаміла, што ён купіў авіябілет на Кіпр. Там сказалі, што пакуль ярданец цалкам вольны ў сваіх дзеяньнях:
(Супрацоўніца КГБ: ) “Ён жа вольны. Свабодны грамадзянін Ярданіі. Гуляе па Менску, напэўна”.
Але КГБ абвінавачвае гэтага грамадзяніна Ярданіі ў тым, што ён уцягваў у Менску выхадцаў з краінаў Блізкага Ўсходу ў радыкальную экстрэмісцкую групоўку “Арраід” і быў сябрам тэрарыстычнай арганізацыі “Палестынскі ісьлямскі джыгад”. Ці мелі такія зьвесткі ўкраінскія спэцслужбы і чаму яны не паінфармавалі беларускіх калег? Вось як адказаў на гэтае пытаньне начальнік прэсавага цэнтру Службы бясьпекі Ўкраіны Аляксандар Скрыпнік:
(Скрыпнік: ) “Гэта дужа цяжка сказаць. Трэба афіцыйны запыт, каб глядзелі і мы, і памежнікі. Вы ж разумееце, колькі людзей праходзіла — як нелегальных мігрантаў, гэтак і дэпартаваных. І неабавязкова гэта было наша ведамства. Гэта магло быць па лініі памежнікаў, магло па нашай лініі. Гэта мажліва высьветліць на працягу тыдня. Калі б гэта было неяк цягам мінулага месяца хаця б, была бы інфармацыя на слыху. Я ня памятаю асабіста — я ўжо тут тры гады”.
Амбасада Ярданіі ў Маскве, у консульскую акругу якой уваходзіць Беларусь, пра дэпартацыю свайго грамадзяніна даведалася ад Радыё Свабода і выказала зьдзіўленьне, што яе не паінфармаваў пра гэта афіцыйны Менск.
(Дыплямат: ) “На жаль, пакуль афіцыйнага паведамленьня мы не атрымалі ад беларускіх уладаў. Як толькі мы атрымалі ваш факс, амбасада вырашыла зьвярнуцца да МЗС Рэспублікі Беларусь, каб высьветліць гэты інцыдэнт і атрымаць больш падрабязную інфармацыю — паводле якой прыкметы, паводле якіх адносінаў гэта было. Амбасада будзе абавязкова абараняць яго”, — заявіў ярданскі дыплямат пра свайго суайчыньніка ў Менску.
А вось амбасада Палестыны ў Менску ад усялякіх камэнтароў адмовілася — як і Беларуская мэдычная акадэмія пасьлядыплёмнай адукацыі. Хаця ў КГБ заявілі, што прэтэнзіяў да гэтай акадэміі ня маюць, яе супрацоўнікі цяпер баяцца размаўляць на тэму навучаньня асьпіранта зь Ярданіі.
