Паводле спадара Міхневіча пераход краінаў-кандыдатаў на агульны мытны тарыф і сыстэму прэфэрэнцыяў Эўразьвязу пагоршыць умовы доступу беларускіх тавараў на рынкі Латвіі і Эстоніі, акрамя таго ўзьнікнуць праблемы з экспартам ў краіны-новыя сябры Зьвязу беларускіх тавараў, у адносінах да якіх дзейнічаюць квоты.
Паводле намесьніка кіраўніка МЗС гэта ў першую чаргу тычыцца ўжываньня антыдэмпінгавых мытаў на калійныя і азотныя ўгнаеньні, хімічныя валокны, а таксама квотаў на некаторыя віды тэкстылю.
Аляксандар Міхневіч сказаў, што толькі з прычыны антыдэмпінгавых мераў з боку Эўразьвязу страты Беларусі на эўрапейскім рынку могуць скласьці каля 100 мільёнаў даляраў.
Дыплямат паведаміў, што цяпер на долю краінаў Эўразьвязу прыпадае 17% замежнагандлёвага абароту Беларусі. Паводле яго, у выніку пашырэньня Зьвязу ягоная доля ў беларускім зьнешнім гандлі павялічыцца ўдвая.
Нагадаем, што ў траўні 2004 году ў склад Эўразьвязу войдуць дзесяць краінаў, у тым ліку суседзі Беларусі Польшча, Літва і Латвія.
