Студэнты і выкладчыкі інстытуту прыходзяць на заняткі, як і звычайна. Некаторыя ўвогуле ня ведаюць аб тым, што іхная навучальная ўстанова згодна з загадам міністра ліквідоўваецца. Паколькі чыноўнікі Міністэрства адукацыі адмовіліся патлумачыць прычыны закрыцьця інстытуту, у кулюарах выказваюць розныя вэрсіі. Прадстаўнікі габрэйскіх арганізацыяў лічаць, што галоўнай мэтай уладаў ёсьць закрыццё катэдры юдаікі. Прэзыдэнт юдэйскага рэлігійнага аб’яднаньня Юры Дорн патлумачыў гэта так:
(Дорн: ) “Хутчэй за ўсё, гэта нейкі адказ, гэта наступствы пагаршэньня беларуска-ізраільскіх дачыненьняў. Гэты погляд падзяляе большасьць сяброў габрэйскай грамады ў Беларусі. Канечне, дачыненьні пагоршыліся. І зь Беларусі, і з Ізраілю адклікалі амбасадараў. Ізраіль зачыніў сваю амбасаду. Амбасада Беларусі ў Ізраілі спыніла выдачу візаў. Гэта я яшчэ мякка кажу, бо насамрэч можна было б дадаць болей. Тое, што закрылі інстытут, дык папросту яшчэ раз хацелі паказаць, што ў Беларусі ёсьць нейкія рычагі ціску і на габрэйскую грамаду. Тое, што ў інстытуце рыхтавалі кадры ў тым ліку і для грамады — не сакрэт”.
23 верасьня на навуковай радзе Белдзяржунівэрсытэту будуць прымаць рашэньне ў справе захаваньня ўнікальнага інстытуту. Будуць абмяркоўваць задачы камісіі, якой даручаць весьці перамовы з чыноўнікамі Міністэрства адукацыі, каб інстытут захавалі хаця як факультэт БДУ. Цікава, што ў камісію абралі былога міністра адукацыі Пятра Брыгадзіна, які тры месяцы таму падпісаў загад аб ліквідацыі Нацыянальнага гуманітарнага ліцэю імя Якуба Коласа.
