Паводле прадстаўніка Дзярждэпартамэнту Сырыя ўяўляе падвойную пагрозу міжнароднай бясьпецы: яна падтрымлівае тэрарыстычныя групоўкі і спрабуе атрымаць ці стварыць зброю масавага зьнішчэньня.
Джон Болтан абвінаваціў Дамаск у варожых дзеяньнях да сілаў кааліцыі ў Іраку. Паводле яго Сырыя пастаўляла зброю ў Ірак напярэдадні вайны, да таго ж яна дазваляла арабскім экстрэмістам пераходзіць празь яе тэрыторыю ў Ірак, каб ваяваць з амэрыканскімі жаўнерамі.
Паводле Болтана гэта адбывалася падчас вайны і адбываецца цяпер. Да таго ж Сырыя працягвае падтрымліваць у Лібане групоўку Хэсбала, якую Злучаныя Штаты лічаць тэрарыстычнай групай.
Ня меншую занепакоенасьць Вашынгтону выклікаюць і праграмы Дамаску адносна зброі масавага зьнішчэньня. Джон Болтан заявіў:
(Болтан: ) “Ад сярэдзіны 70-х Сырыя ўсяляк спрабавала стаць адной з найбольш разьвітых арабскіх краінаў у галіне хімічных узбраеньняў. І цяпер так яно і ёсьць. Гэтая дзяржава мае запас нэрвова-паралітычнага газу зарыну, які можна пераносіць на самалёце ці балістычнай ракетай. Акрамя гэтага Сырыя занятая распрацоўкай яшчэ таксычнага і небясьпечнага газу ві-экс.”
Джон Болтан паведаміў, што Вашынгтон сочыць за супрацоўнітвам Дамаску з Масквой, якое можа прывесьці Сырыю да стварэньня ядзернай зброі.
(Болтан: ) “Расея і Сырыя зацьвердзілі праект праграмы супрацоўніцтва ў галіне цывільнай атамнай энэргетыкі. Больш шырокі доступ Сырыі да расейскіх навуковых і тэхнічных рэсырсаў можа пашырыць магчымасьці Сырыі, калі яна вырашыць стварыць ядзерную зброю.”
Намесьнік дзяржсакратара ЗША заявіў, што “дзяржавы-ізгоі” мусяць зразумець, што ім давядзецца дорага заплаціць за спробы завалодаць зброяй масавага зьнішчэньня.
(Болтан: ) “Мы аддаем перавагу вырашэньню гэтых праблемаў мірнымі і дыпляматычнымі сродкамі, аднак прэзыдэнт Буш даў ясна зразумець, што мы ня выключаем аніякіх варыянтаў.”
Цяпер Кангрэс ЗША абмяркоўвае закон, які дазволіць увесьці супраць Сырыі палітычныя і эканамічныя санкцыі.
У выступе Джона Болтана была прыгаданая Расеі як краіна, якая можа спрыяць стварэньню сірыйскіх арсэналаў ядзернай зброі. Амэрыканскі друк піша пра шыроокае супрацоўніцтва ў ваеннай галіне таксама паміж Менскам і Дамаскам.
Выданьне Middle East Newsline (інтэрнэт-выданьне, якое спэцыялізуецца на праблемах Блізкага Ўсходу) са спасылкай на спэцслужбы заходніх краінаў паведамляе пра пастаўкі зь Беларусі ў Сырыю сотняў супрацьпаветраных ракетаў і установак СА-18.
Паводле выданьня Сырыя набыла ў Беларусі тры партыі такіх ракетаў цаной у 30 мільёнаў даляраў. Першая партыя прыйшла напярэдадні амэрыканскай апэрацыі ў Іраку, астатнія дзьве – сёлета летам. Гэтыя сыстэмы СПА паводле Middle East Newsline знаходзяцца цяпер на сырыйскай ваеннай базе на мяжы зь Лібанам.