Найбольшая колькасьць адмыслоўцаў, якія сталі на біржу працы, закончылі Дзяржаўны ўнівэрсытэт імя Францішка Скарыны, Тэхнічны імя Сухога і Гандлёва-эканамічны.
У чарзе на рэгістрацыю гутару з маладой настаўніцай расейскай мовы і літаратуры, сёлетняй выпускніцай філялягічнага факультэту Ўніверсытэту імя Скарыны Ірынай Тупіцынай.
(Тупіцына: ) “У мяне “вольны” дыплём, і я не магу нідзе ўладкавацца. У школах скарачэньні, сказалі, што выкладчыкі не патрэбныя. Гэтаксама, як і выхавацелі дзіцячых садкоў”.
Маладая настаўніца лічыць, што, калі няма працы для выпускнікоў, то варта перагледзець сыстэму падрыхтоўкі адмыслоўцаў у вышэйшых навучальных установах…
(Тупіцына: ) “Калі няма працы для выпускнікоў, то мусяць скараціць групы ва ўнівэрсытэтах, не набіраць столькі людзей. У нас было 3 групы філёлягаў — гэта амаль 90 выпускнікоў. І цяпер тры групы набралі… І гэтыя 90 чалавек потым застануцца без працы. Жахліва!”
У пошуках працы у Цэнтар занятасьці зьвярнуліся звыш 170 адмыслоўцаў сярэдніх спэцыяльных навучальных установаў.
Вось што распавяла выпускніца эканамічнага аддзяленьня Політэхнічнага тэхнікуму Тацяна Сьвішч:
(Сьвішч: ) “Я думаю, што пасьля тэхнікумаў таксама павінны даваць накіраваньне, каб мы маглі хоць дзе-небудзь уладкавацца на працу. Сядзець дома няма сэнсу”.
