Выданьне цытуе міністра працы Беларусі Антаніну Мораву, паводле якой моладзь да 30 гадоў складае палову зарэгістраваных беларускіх беспрацоўных, якіх налічваецца 140 тысячаў. Прыблізна каля 30 тысячаў выпускнікоў школаў штогод адразу ж трапляюць на біржу працы.
Міністэрства ўнутраных справаў падае статыстыку, згодна зь якой летась маладыя беспрацоўныя зьдзейсьнілі палову ўсіх злачынстваў. Адмыслоўцы даюць розныя тлумачэньні праблемы беларускага моладзевага беспрацоўя. Адны бычаць у гэтым своеасаблівае рэха дэмаграфічнага выбуху 80-х. Эскпэрты адзначаюць, што ў краіне ніколі не было такой вялікай колькасьці насельніцтва працоўнага ўзросту. Іншыя адмыслоўцы бачаць прычыну моладзевага беспрацоўя ў стагнацыі і нерэфармаванасьці нацыянальнай эканомікі.
Беспрацоўе ў Беларусі пагражае ня толькі выпускнікам школаў. Толькі ў Менску ня маюць працы амаль 13 тысячаў выпускнікоў ВНУ. Бюлетэнь інстытуту праблемаў вайны і міру паведамляе, што за апошнія паўгоду прыблізна палова менскіх беспрацоўных з вышэйшай адукацыяй вырашылі стаць рабочымі нізкай кваліфікацыі. У публікацыі прыводзіцца прыклад 20-гадовага менчука Аляксандра, які скончыў кансэрваторыю, але вымушаны працаваць вадаправодчыкам. З горкай іроніяй ён адзначае, што трубы сьцёкавых водаў нагадваюць яму гукі саксафону.