Міністэрства інфармацыі Беларусі паўтара году адмаўляецца рэгістраваць друкаваны орган Лібэральна-дэмакратычнае партыі з назовам “Демократическая газета”, але прычыны гэтага не тлумачыць. Выдавецкае прадпрыемства “Вольніца-мэдыя”, створанае адмыслова для выпуску гэтай газэты, падало пазоў супраць Мінінфарму ды Міністэрства фінансаў, патрабуючы прызнаць дзеяньні першага ведамства неправамернымі, а з другога спагнаць кампэнсацыю стратаў за час прамаруджваньня з рэгістрацыяй “Демократической газеты”.
Вышэйшы гаспадарчы суд ў сераду пачаў разгляд гэтай справы, але першае паседжаньне доўжылася ўсяго некалькі хвілін, пасьля чаго справа была адкладзеная на месяц. Лідэр ЛДП Сяргей Гайдукевіч пракамэнтаваў гэта так:
(Гайдукевіч: ) “Настолькі зразумела, што справа выйгрышная. Там разглядаць проста няма чаго. Адклалі з прычыны, што мы не далі арыгінал рашэньня гаспадарчага суду”.
Спадар Гайдукевіч патлумачыў, што Менскі гарадзкі гаспадарчы суд вырашыў спагнаць з прадпрыемства “Вольніца-мэдыя” грошы за арэнду памяшканьня, у якім мусіла працаваць рэдакцыя “Демократической газеты”. Гарадзкі суд выдаў копію рашэньня, а Вышэйшы гаспадарчы запатрабаваў яго арыгінал. З гэтай прычыны наступнае паседжаньне суду адбудзецца 28 жніўня. На маё пытаньне, колькі яшчэ ён разьлічвае чакаць рэгістрацыі партыйнай газэты, спадар Гайдукевіч адказаў гэтак:
(Гайдукевіч: ) “Да канца чацьвертага-пятага тэрміну Лукашэнкі, я думаю, на гэта трэба разьлічваць. Мы ж атрымалі цэлае памяшканьне ад галоўнай гаспадарчай управы адміністрацыі прэзыдэнта й пратрымалі яго больш за год, плацілі за яго арэнду. Дакумэнты цэлы год ляжалі ў Міністэрстве друку. Вось я сёньня хацеў на судзе сказаць — усю размову падаць спадара Падгайнага са мной. Спадар Падгайны, калі я яму тэлефанаваў, казаў: “Вось мне так цяжка, вось мне Князеў сказаў не выпускаць”. Гэта намесьнік кіраўніка адміністрацыі. Я хацеў гэта ўсё агучыць на судзе”.
Лідэр Лібэральна-дэмакратычнае партыі дадаў, што зьвяртаўся ў адміністрацыю прэзыдэнта па тлумачэньні. Нагадаю, што першы намесьнік кіраўніка гэтай адміністрацыі Станіслаў Князеў там ужо не працуе — ён быў прызначаны рэктарам прэзыдэнцкай Акадэміі кіраваньня. Увогуле пасады першага намесьніка кіраўніка адміністрацыі прэзыдэнта цяпер няма. А іншыя чыноўнікі загад не рэгістраваць “Демократическую газету” не пацьвярджаюць.
(Гайдукевіч: ) “Усе кажуць: ніякіх камандаў не было. То бок спадару Падгайнаму далі магчымасьць самому прыняць рашэньне. А ён баязьлівец паводле натуры. Проста баязьлівы чыноўнік, які не выконвае законаў Рэспублікі Беларусь. Калі ён не выконвае ў дачыненьні да мяне законаў, значыць, усе газэты, якія закрываюцца, усё гэта робіцца беззаконна”.
Трэба адзначыць, што Міністэрства інфармацыі фактычна ўвогуле спыніла рэгістрацыю масава-палітычных выданьняў. Прадпрыемства “Марат”, якое выдае прыпыненую на тры месяцы “Белорусскую деловую газету”, ня можа зарэгістраваць новае выданьне зь іншай назвай.