Лінкі ўнівэрсальнага доступу

СВАБОДА СЛОВА Ў БЕЛАРУСІ Ў ПУБЛІКАЦЫЯХ НЯМЕЦКІХ МЭДЫЯЎ


Ул. інф.

Паводле аўтара, канфрантацыя паміж дзяржавай і недзяржаўнымі выданьнямі стала звыклай для Беларусі, бо цягнецца амаль 10 гадоў, ад часу прэзыдэнцтва Лукашэнкі. Публікацыя выклікала вялікі чытацкі розгалас. Нагадаем, што сярод чытачоў “Frankfurter Allgemeine” прадстаўнікі нямецкай эліты: вядомыя палітыкі, прадпрымальнікі, мэцэнаты. У адным з апошніх нумароў газэты зьмешчаныя нататкі яе сталага чытача з Гамбургу — графа фон Калнайна.

Як вынікае з апошніх падзеяў, Лукашэнка мае намер накінуць наморднік і на “БДГ” — адну з самых прафэсійна моцных і салідных газэт краіны, — піша граф фон Калнайн. Паводле нямецкага чытача, тыя, хто ведаюць беларускую сытуацыю, рэагуюць на яе адначасна і са зьдзіўленьнем, і са шкадаваньнем. “БДГ” ня ёсьць нейкім бульварным правінцыйным лістком. Гэта газэта заўсёды вызначалася сваёй грамадзянскай пазыцыяй. Яна не была носьбітам нейкіх злых і агрэсіўных ідэяў. Яе фармат разьлічаны на інтэлектуалаў і прадпрымальнікаў, публікацыі прысьвечаныя тым нешматлікім кволым парасткам грамадзянскай сьвядомасьці і свабоды меркаваньняў, якія апошні час сталі зьяўляцца ў Беларусі. Дарэчы, паводле Міжнароднага інстытуту прэсы, у Беларусі ў гэтым сэнсе ўсё яшчэ працягваецца “сырая працяглая зіма”.

У 2001 годзе “БДГ” стала ляўрэатам міжнароднай прэміі імя Герда Букерыўса пры фондзе нямецкай газэты “Ды Цайт”. Аднак, — піша нямецкі чытач, — выглядае, што беларускаму прэзыдэнту, які ў 2001 годзе атрымаў даволі сумнеўную перамогу на выбарах, зусім не да клопату пра ўсталяваньне іншага клімату ў Беларусі, пра дабрабыт беларускага народу.

Што гэта? Нейкая далёкая экзатычная трагедыя? — пытаецца граф фон Калнайн і працягвае: “У наступным годзе наш Эўрапейскі Зьвяз будзе мець агульныя межы зь Беларусьсю. Менавіта праз гэтую краіну ідзе найбольшая колькасьць паставак да нашага новага палітычнага сябра на Ўсходзе — Расеі. Закрыцьцё рэдакцыі вядучай беларускай газэты выключна на падставе чыіхсьці асабістых злосьці і самадурства — гэты сумны правінцыйны фарс тычыць і непасрэдна нас, немцаў. Наша пільная ўвага да сытуацыі ў гэтай краіне ёсьць жыцьцёвым эліксырам для тых у Беларусі, хто адстойвае свабоду меркаваньняў.

Такое паняцьце як “інтарэс Захаду да правоў чалавека на Ўсходзе” немцы ведаюць на прыкладзе сваёй уласнай гісторыі. І ў Нямеччыне трэба было шмат змагацца за свабоду слова, а таксама абараняць яе. Такія публікацыі “Frankfurter Allgemeine” як артыкул Райнгарда Вэзэра ёсьць пэўнай падтрымкай для незалежнай прэсы ў Беларусі”, — лічыць граф фон Калнайн. Разам зь іншымі чытачамі ён будзе вітаць далейшую ўвагу нямецкіх журналістаў да беларускай сытуацыі.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG