“Gazeta Wyborcza” адзначае, што “вучні Дзяржаўнага гуманітарнага ліцэю на сваёй Радзіме ня могуць годна скончыць навучаньне на роднай мове. Ліцэісты нават зьвярнуліся да ўрадаў шэрагу іншых дзяржаваў з просьбай абараніць іхную навучальную ўстанову, бо свой урад ня можа гарантаваць ім права вучыцца па-беларуску”.
Польскі штодзёньнік піша, што праз 13 гадоў пасьля свайго заснаваньня гуманітарны ліцэй ў Менску застаўся адзінай выспай беларускасьці ў сфэры адукацыі, на існаваньне якой цяперашнія ўлады і дагэтуль зь цяжкасьцю пагаджаліся. Там заўсёды панаваў “вольны дух”, а сярод выкладчыкаў былі нават вядомыя апазыцыйныя дзеячы, як, прыкладам, перакладчык і мовазнаўца Лявон Баршчэўскі.
Газэта прыгадвае, што аднойчы, у 1997 годзе, ліцэй ўжо ледзь ня выкінулі на вуліцу, бо будынак, у якім месьціцца гэтая навучальная установа, спадабаўся адміністрацыі прэзыдэнта. А цяпер, нягледзячы на пратэсты настаўнікаў, навучэнцаў і іхных бацькоў, улады зьмянілі заснавальніка і шматгадовага дырэктара ліцэю Ўладзімера Коласа на чалавека, які нават не гаворыць па-беларуску.
“Gazeta Wyborcza” адзначае таксама, што загад аб зьменах у статусе ліцэю быў падпісаны акурат у дзень пахаваньня вялікага беларускага пісьменьніка Васіля Быкава, які незадоўга да сваёй сьмерці заклікаў бараніць ліцэй да апошняга.