Маёр міліцыі Арцёменка напісаў, што сканфіскаваныя 12 чэрвеня ягонымі падначаленымі на чыгуначным вакзале Магілёва амаль 2 тысячы асобнікаў 17-га нумару “Предпринимательской газеты” зьнішчаныя “з прычыны таго, што згодна з загадам Міністэрства інфармацыі Рэспублікі Беларусь ад 19 чэрвеня 2003 году №109 дзейнасьць газэты “Предпринимательская газета” прыпыненая на 3 месяцы”. Прадпрыемства “Марат” зьвяртае ўвагу на тое, што гэты загад быў падпісаны праз тыдзень пасьля затрыманьня часткі накладу газэты.
Загад Мінінфарму быў выкліканы надрукаваным у 17-м нумары “Предпринимателськой газеты” артыкулам “Узаконенае бязьмежжа”. Як зазначаюць у прадпрыемстве “Марат”, назву гэтага артыкулу можна паўтарыць і ў дачыненьні да сытуацыі ў Магілёве, дзе міліцыя ўзяла на сябе функцыі цэнзара. Акрамя загаду Міністэрства інфармацыі, магілёўская транспартная міліцыя называе падставай для зьнішчэньня газэты “адсутнасьць атрымальніка”, бо нібыта ніхто пасьля канфіскацыі накладу не зьвяртаўся з пытаньнем пра яе выдачу.
Адметна, што паведамленьне пра зьнішчэньне газэты падпісанае 24 чэрвеня, але атрыманае яно было ў Менску толькі 30 чэрвеня. Акрамя таго, прадпрыемству “Марат” не паведамлялі афіцыйна, што частка накладу была затрыманая на магілёўскім вакзале.