Контртэрарыстычны камітэт Рады бясьпекі ААН быў створаны пасьля тэрарыстычнага нападу на ЗША. У справаздачы камітэту, абнародаванай учора, адзначаецца, што “Аль Кайда” па ранейшаму ўяўляе пагрозу міжнароднай бясьпецы і дэманструе здольнасьць супрацьстаяць контртэрарыстычным высілкам. Актыўнасьць “Аль Кайды” праявілася гэтай вясною ў тэрарыстычных акцыях у Савудаўскай Арабіі, Чачэніі, Марока і Афганістане. Экспэрты ААН гавораць пра “трэцяе пакаленьне” Аль Кайды” – пра генэрацыю маладых мусульманскіх радыкалаў, якія прайшлі ў арганізацыю ўжо пасьля выгнаньня “Аль Кайды” з Афганістану. Кіраўнік камітэту Майкл Чандлер адзначае, што менавіта гэтае новае пакаленьне “Аль Кайды” зьдзейсьніла 17 траўня тэракт у Марока, у выніку якога загінуў 41 чалавек. Ніводзін зь людзей, што ажыцьцяўлялі напад, ня меў дачыненьня да Афганістану, і ўсё ж яны маюць тую ж самую ідэалёгію і дзейнічаюць падобным чынам.
Разам з тым не спыніла актыўнасьць і ранейшае пакаленьне тэрарыстычнай сеткі. У тэрарыстычным нападзе ў Савудаўскай Арабіі 13 траўня, калі загінула 34 чалавекі, удзельнічалі баевікі, якія праходзілі навучаньне ў лягерах падрыхтоўкі ў Афганістане. Разам з тым, кіраўнік контртэрарыстычнага камітэту Майкл Чандлер паведаміў, што экспэрты ня выявілі сувязяў паміж “Аль Кайдай” і былым ірацкім рэжымам. Пра наяўнасьць такіх сувязяў заяўлялі амэрыканскія адмыслоўцы. Зараз камітэт ААН высьвятляе сувязі аль-кайдаўцаў з іранскімі ўладамі.
Паводле дасьледаваньня, тэрарыстычная сетка працягвае атрымліваць фінансаваньне ад гандлю наркотыкамі, якія ідуць з Афганістану, а таксама ад донарскіх фондаў.
Контртэрарыстычны камітэт ААН упершыню ўнёс у сьпіс асобаў, зьвязаных з “Аль Кайдай”, імя прадстаўніка чачэнскага супраціву. Гэта – Зэлімхан Яндарбіеў, былы выконваючы абавязкі прэзыдэнта Чачэніі, які зараз жыве ў Катары.
Паводле Майкла Чандлера, устаноўленая сувязь паміж “Аль Кайдай” і чачэнскімі паўстанцамі, якія нядаўна ажыцьцявілі ў Чачэніі сэрыю самазабойчых тэрактаў. Былі пэўныя сувязі зь людзьмі “Аль Кайды”, якія дзейнічалі ў Чачэніі, праз Босьнію, і ёсьць пэўнае падабенства мэтадаў “Аль Кайды” і чачэнскага супраціву, прынамсі, бомбавыя напады самазабойцаў.
Паводле зьвестак экспэртаў, “Аль Кайда” імкнецца атрымаць матэрыялы, каб стварыць хаця б гэтак званую “брудную ядзерную бомбу”. Вынік выбуху такой бомбы менш разбуральны, чым ад сапраўднай ядзернай, але разьлік робіцца на псыхалягічны эфэкт. Камітэт ААН заклікае краіны-сябры далучыцца да пагадненьня аб абароне ядзерных матэрыялаў. Майкл Чандлер падкрэсьлівае, што кантроль мусіць ажыцьцяўляцца за нераспаўсюдам любой зброі масавага зьнішчэньня: “Мы мусім ўзмацніць высілкі, каб быць упэўненымі, што “Аль Кайда” і зьвязаныя зь ёй арганізацыі не набываюць ядзерныя, радыёлягічныя, хімічныя і біялягічныя сродкі і матэрыялы.
Вайна з тэрарызмам далёкая ад завяршэньня. Здавалася, што пасьля арыштаў намесьнікаў Усамы бін Ладэна Галіда шэйха Махамэда і Абу Зубайды “Аль Кайда” атрымала сакрушальны ўдар. Аднак, паводле справаздачы контртэрарыстычнага камітэту Рады бясьпекі ААН, экстрэмісты маюць яшчэ дастаткова сілаў, каб наносіць удары паводле свайго выбару.
