(Валянцін Тарас: ) “Я нават ня ведаю, з чаго пачаць, таму што душаць сьлёзы, душыць вялікае гора. І падтрымка толькі ў тым, што гэта ня толькі маё гора, а гора ўсёй Беларусі, усёй нашай літаратуры, усіх тых людзей, якія разумеюць, чым быў для нас Васіль Быкаў і чым ён застанецца для нас. Я шчасьлівы тым, што ён быў побач са мною.
Ён даручыў мне зрабіць здабыткам расейскага чытача ягоную кнігу, якая прагучала на “Свабодзе” – “Доўгая дарога дадому”. Я гэта абавязкова зраблю, зраблю з усёй сілай, на якую толькі здольны як перакладчык. Ягоных твораў. Вечная памяць, вечная слава нашаму роднаму, незабыўнаму Васілю.
