Былы пераможца леташняга жніва мэханізатар клецкага калгасу “Кастрычнік” Пётар Пільневіч кажа, што ўжо не спадзяецца на перамогу ў змаганьні з судовай сыстэмай. Пільневіч падаваў скаргу ў Менскую абласную пракуратуру, але там толькі паспачувалі няўдачліваму мэханізатару, а выносіць пратэст на прысуд Менскага абласнога суду не пажадалі. Нагадаю, мэханізатару далі тры гады турмы быццам за наўмыснае фальшаваньне вынікаў жніва.
Але Пільневіч настойвае, што памылка ў падвядзеньні вынікаў жніва адбылася зь віны чыноўнікаў. Ня здолеўшы дамагчыся праўды ў судах, мэханізатар напісаў ліст Аляксандру Лукашэнку:
(Пільневіч: ) “Пра што я пішу? Што ўсё лета працаваў, ліў пот, а ў выніку вось такую атрымаў узнагароду. Пішу, каб хаця б не каралі турмой”.
Гэты ліст Пётар Пільневіч занес у адміністрацыю прэзыдэнта. Ліст там прынялі, але шчыра сказалі, што падобныя лісты да кіраўніка дзяржавы не даходзяць — маўляў, зашмат у яго іншых важкіх справаў. Таму, хутчэй за ўсё, ліст з адміністрацыі проста перададуць у Менскі абласны суд, які выносіў прысуд. Але Пётар Пільневіч кажа, што і гэта ўжо будзе добра, усё ж судзьдзі будуць ведаць, што ён скардзіўся самому Лукашэнку. Мэханізатар мяркуе, што сам Лукашэнка гісторыю пра тое, як судзілі пераможцаў леташняга жніва, можа і ня ведаць:
(Пільневіч: ) “Ён, напэўна, і ня ведае пра гэтую справу. Яму калі нешта і сказалі, дык не да канца”.
Летась на “Дажынках” у Полацку Аляксандар Лукашэнка асабіста ўзнагародзіў пераможцаў жніва клецкіх камбайнэраў Пільневіча і Бондарава. “Зьвеньнявы” Ўладзімер Бондараў атрымаў у падарунак аўтамабіль “Жыгулі”, а ягонаму памочніку Пільневічу дастаўся матацыкл. Між тым, неўзабаве кантралёры пералічылі вынікі жніва й прызы ў пераможцаў адабралі.
Высьветлілася, што Бондараў зь Пільневічам былі толькі трэцімі ў рэспубліканскім спаборніцтве. Больш за тое — на іх завялі крымінальную справу і далі Пільневічу тры гады турмы, а Бондараву два гады ўмоўна. Пільневіч з гэтым прысудам не пагадзіўся. З дапамогай адваката Веры Страмкоўскай ён спрабуе прысуд аспрэчыць, але пакуль безвынікова.
Дарэчы, паводле зьвестак з калгасу “Кастрычнік”, камбайн “Бізон”, на якім быў пастаўлены ілжэрэкорд, у мэханізатараў забяруць. Іх увогуле могуць не дапусьціць да жніва. Такім чынам, калі Пільневіча не пасадзяць у турму, дык пакараюць матэрыяльна, бо жніво для мэханізатара — адзіная магчымасьць зарабіць у вёсцы прыстойныя грошы.