Кошты на беларускае піва падвысіліся зь дзьвюх прычынаў. Па-першае, яшчэ ў канцы красавіка Міністэрства эканомікі прыняло пастанову №11 “Пра кошты на ячмень піваварны і прадукцыю піваварных заводаў”. Гэты дакумэнт зьняў для вытворцаў піва абмежаваньні на падвышэньні цэнаў на іхную прадукцыю. Раней яны маглі ўзрастаць толькі сынхронна з узроўнем інфляцыі ў краіне. Па-другое, падвысіўся памер акцызаў. Гэты ўскосны падатак складае 0,04 эўра за адзін літар піва, і паколькі курс гэтай валюты апошнія месяцы імкліва расьце, то і акцызы ідуць уверх.
Прычыны росту цэнаў на беларускае піва мне патлумачыла начальніца фінансава-эканамічнага аддзелу заводу “Аліварыя” Таісія Рудамінская. Паводле ейных словаў, Міністэрства эканомікі вырашыла адпусьціць кошты на прадукцыю бровараў вельмі своечасова.
(Рудамінская: ) “Урад цяпер разумее, што галіна наагул у вельмі гаротным стане. Заводам патрэбнае пераўзбраеньне. Калі па-ранейшаму кошты абмяжоўваць, заводы могуць мець вельмі нізкую рэнтабэльнасьць і ня здолеюць замяніць абсталяваньне і ня змогуць у далейшай пэрспэктыве працаваць. Мы разьлічваем, што дзякуючы падвышэньню коштаў атрымаем большы прыбытак, але яго зусім недастаткова, каб выконваць праграму пераўзбраеньня ў тэрміны, якія мы заплянавалі”.
Спадарыня Рудамінская таксама адзначыла, што ў зьвязку з захадамі па абмежаваньні імпарту расейскага піва попыт на прадукцыю айчынных бровараў рэзка падвысіўся. Калі параўноўваць аб’ёмы продажу ў красавіку і ў траўні, то ў адной толькі “Аліварыі” гэты паказьнік вырас на 40%.
Самі спажыўцы, зь якімі я гутарыла ў менскіх харчовых крамах, на падвышэньне коштаў на беларускае піва асаблівай увагі не зьвярнулі і ў большасьці сваёй запэўнівалі мяне ва ўласным “піўным патрыятызьме”.
(Спадар: ) “Жыцьцё такое. Цяпер усё даражэе. І піва даражэе”.
(Спадарычна: ) “Я не набываю беларускае піва, таму мне гэта…”
(Карэспандэнтка: ) “А чаму вы яго не набываеце?”
(Спадарычна: ) “Я набываю толькі тое піва, якое на слыху. Напэўна, гэта ад рэклямы залежыць”.
(Спадар: ) “З усяго гэтага піва нармальнае толькі “Аліварыя”.
(Карэспандэнтка: ) “А тое, што яно падаражэла, для вас нейкую ролю адыгрывае?”
(Спадар: ) “Не”.
(Студэнт: ) “Як студэнты, мы да гэтага ставімся адмоўна, бо піва наш асноўны прадукт спажываньня”.
(Студэнт: ) “Пілі й будзем піць. Расейскае піва мы амаль што не ўжываем”.
(Карэспандэнтка: ) “А чаму? Яно вас якасьцю не задвавальняе ці зь нейкіх іншых прычынаў?”
(Студэнт: ) “Якасьцю”.
(Спадар: ) “Лета, сьпёка. Усе п’юць піва. Напэўна таксама таму, што расейскае цяпер падаражэла, вялікай канкурэнцыі няма, і аўтаматычна кошты ўзьнялі. Раней жа ўсе расейскае піва набывалі. Попыт на айчыннае піва ёсьць, таму трэба кошты падвышаць”.
Разам з тым мае суразмоўцы адзначалі, што беларускае піва пакуль не настолькі высокай якасьці й збольшага саступае замежнаму, хоць і каштуе ў паўтара-два разы таньней.
