Бальшыня беларускіх аўтаперавозчыкаў купляе патрыманыя замежныя грузавікі для міжнародных перавозак, карыстаючыся ільготным рэжымам часовага ўвозу. Дагэтуль дзейнічала ўрадавая пастанова ад 1997 году, якая ў такіх выпадках вызваляла ад мытных плацяжоў. Чаму тэрмінова спатрэбілася скасаваць ранейшыя палёгкі, тлумачыць адзін з супрацоўнікаў Мытнага камітэту.
(Супрацоўнік Мытнага камітэту: ) “Гэта пытаньне прэзыдэнта, таму ўсё вельмі сур’ёзна. Пастанову Саўміну куруе сам Лукашэнка. Усё завязанае на бюджэце, бо ўсе льготы рэглямэнтуе ў нас адзін чалавек. Сама пастанова наогул яшчэ сырая. Тарыфы не падрыхтаваныя, таму ўсё можа нахіліцца як у зваротны бок, гэтак і ў новы. Але зараз кошты бяруцца па-новаму — дадатковыя 3% ад мытнага кошту штомесяц. Патрэбныя яшчэ ўзгадненьні ў Мінюсьце, Мінфіне, тарыфы пакуль напішуць — ня ўсё так хутка”.
Нягледзячы на тое, што памеры мытных збораў пакуль распрацоўваюцца, гэтак званая “растаможка” ўжо пералічваецца па-новаму. Прычым, патрабуюць папярэдняй аплаты ў памеры ўжо згаданых 3% ад мытнага кошту за год наперад. Сталічны перавозчык Віталь Кавалеўскі сутыкнуўся з тым, што яму налічылі за 17-гадовы грузавы “Мэрсэдэс” 36 тысячаў эўра.
(Кавалеўскі: ) “Раней за часовы ўвоз, лічы, нічога не плацілі: плацілі падаткі, і ўсё. А зараз часовы ўвоз — гэта завоблачныя кошты, і плаціць трэба наперад. Карацей, закон робяць так, што ўсё — кропка, ніякай альтэрнатывы не застаецца. Растаможыць за 36 тысячаў эўра грузавік 85-га году? Ён у лепшым выпадку за год прынясе 8 тысячаў даляраў прыбытку. А ў дадатак трэба яшчэ растаможыць паўпрычэп. Вось і ўся арыфмэтыка. Сапраўдны дурдом, усе на вушах стаяць!.. Мой партнэр, дырэктар буйнога прадпрыемства “Кёнігстранс”, зьбіраецца перагнаць свае машыны ў Польшчу. “Белмагістральаўтатранс” сыходзіць у Расею. Я для сябе на бізнэсе пакуль гэтаксама крыж паставіў. Адным наскокам, як заўсёды, бахнулі, і ўсё”.
Аўтаперавозчыкі спадзяюцца, што ва ўрадавыя экспэрты ня пойдуць на радыкальныя захады. Бо адсутнасьць на беларускім рынку айчынных перавозчыкаў тут жа кампэнсуюць бізнэсоўцы з суседніх краінаў — найперш з Расеі. У выніку грошы ад міжнародных перавозак паплывуць за мяжу.