Маладафронтаўцы разгарнулі ў цэнтры Кастрычніцкага пляцу бел-чырвона-белыя сьцягі й транспарант з надпісам “Не – рэфэрэндуму, не – акупацыі!” Арганізатар акцыі Зьміцер Дашкевіч так патлумачыў яе мэту:
(Дашкевіч: ) “Сёньня, у гадавіну рэфэрэндуму, мы выйшлі, каб прадэманстраваць грамадзтву, што рэфэрэндум, які быў у 1995 годзе, ня меў канстытуцыйнай моцы. Ён быў ілжывы, з фальшаваньнямі й пакрадзенымі галасамі. Беларусь — дэмакратычная краіна зь бел-чырвона-белым сьцягам і гербам “Пагоня”. Вось нашыя сьцягі, якія ня зьнішчыць ніякая ўлада… — разьбірайце хлопцы хутчэй, у нас вельмі мала часу”.
А вось што сказала ўдзельніца акцыі, якая не захацела называць сябе:
(Дзяўчына: ) “Я лічу, што мы выйшлі толькі таму, каб паказаць народу, што яшчэ можна змагацца. І дзеля гэтага не абавязкова сядзець у кватэры”.
Да ўдзельнікаў пікету адразу ж падышлі міліцыянты-амонаўцы:
(Амонавец: ) “Вашыя дзеяньні не санкцыянаваныя. Калі вы зараз жа ня згорнеце сьцягі, вы будзеце затрыманыя і адвезеныя ў Цэнтральную РУУС. Бо нельга зьбірацца на Кастрычніцкім пляцы”.
(Дашкевіч: ) “Не — ілжывым рэфэрэндумам, якія адбываліся й могуць адбыцца ў Беларусі! Мы — незалежная краіна!”
У выніку ўдзельнікаў пікету Зьмітра Дашкевіча і Алеся Тарасевіча затрымалі. Цяпер яны знаходзяцца ў адным з пастарункаў Цэнтральнай управы міліцыі Менску. Затрыманым пікетоўцам пагражае арышт тэрмінам да 15 сутак.
Пікету папярэднічала начная акцыя Маладога Фронту. Напярэдадні 14 траўня актывісты гэтай арганізацыі вывесілі бел-чырвона-белыя сьцягі на скрыжаваньні праспэкту Скарыны з вуліцамі Варвашэні й Казлова, а таксама на жылых дамах у мікрараёне “Ўсход-1”.
