Кола падначаленых Кіраўніцтву справаў Лукашэнкі месцаў адпачынку пашыраецца. Апошнія гады былыя савецкія санаторыі ў Сочы, Туапсэ, Місхоры, Юрмале, Друскеніках, якія будаваліся на замову Беларусі, а таксама папулярныя беларускія санаторыі “Нарач”, “Сосны”, “Баравое”, “Гарадзішча”, Бярэзінскі біясфэрны запаведнік і Нацыянальныя паркі “Прыпяцкі” і “Белавеская Пушча” перайшлі ў распараджэньне прэзыдэнцкай адміністрацыі. Цяпер ня рынак, а супрацоўнікі адміністрацыі ўсталёўваюць там кошты на адпачынак, якія ўжо перакрочылі сярэднія цэны на паездку ў Турэччыну ці Эгіпэт.
У дзяржаўным прадпрыемстве “Курорт” Кіраўніцтва справаў прэзыдэнта распавялі, колькі будзе каштаваць адпачынак у падпарадкаваных яму санаторыях гэтым летам.
(Супрацоўніца цэнтру “Курорт”: ) “Калі набываць пуцёўку за поўны кошт, прыкладам, у санаторый “Белоруссия” на рыскім ўзьбярэжжы, то месца ў двайным нумары з поўным курсам лячэньня ідзе з разьліку 23 даляры ў суткі на чалавека. “Белая Русь” у Туапсэ: месца ў звычайным нумары 24 даляры, а ў сэзон яшчэ больш. Калі ж ехаць туды самому, то нармалёвы адпачынак меней як за 30 эўра на чалавека наўрад ці будзе, і гэта толькі са сьняданкамі. Ну, а чыноўнікам ўсё аплачваюць на працы, і яны ў найлепшым выпадку плацяць толькі 10% ад кошту пуцёўкі”.
Гэткім чынам, кошт пражываньня аднаго простага чалавека ў гэтых санаторыях цягам двух тыдняў складае болей як 300 даляраў. А яшчэ трэба заплаціць за праезд, за візу, страхоўку…
Простыя падлікі сьведчаць, што адпачынак звычайнаму функцыянэру каштуе прыблізна ў 10 разоў таньней, чым шараговаму грамадзяніну.
Некаторыя знаёмцы, якія адпачывалі ў Туапсэ, Сочы ці Юрмале мінулымі гадамі, распавядаюць, што бальшыня сэзонных пастаяльцаў — міністры, дэпутаты Нацыянальнага сходу, чыноўнікі дзяржаўных ведамстваў. Вялікі аматар футболу віцэ-сьпікер Уладзімер Канаплёў падчас адпачынку нават арганізаваў штогадовы футбольны турнір, у якім бяруць удзел парямэнтары з Расеі і Ўкраіны, а таксама набліжаныя да ўлады журналісты. Тыя ж, хто ня любіць сьпякоты (як, прыкладам, прэм’ер-міністар Генадзь Навіцкі) накіроўваюцца ў Прыбалтыку, дзе цягам двух-трох тыдняў праходзяць поўны курс санаторнага лячэньня. Супрацоўнікі турфірмаў, якія таксама прадаюць пуцёўкі ў гэтыя ж санаторыі, канстатуюць: дзяржаўныя асобы адпачываюць амаль бясплатна.
(Супрацоўніца турфірмы: ) “Яны могуць аплачваць 10%, могуць 50% або 70% ад кошту. Але пры тым, што ўсе міністэрствы ў нас вельмі “бедныя”, то плацяць пераважна толькі 10%, і крыху болей члены іх сем’яў. А ёсьць нават тыя, хто езьдзіць бясплатна. Таму яны ўсе або ў Юрмале, або ў Туапсэ. Ёсьць катэгорыя ў лечкамісіі асобная — заслужаныя пэнсіянэры, Героі Савецкага Саюзу, Сацыялістычнай Працы і г.д., якія таксама адпачываюць бясплатна. Адзіны выдатак — сваім коштам дарога, але гэта капейкі, таму ўсе карыстаюцца і езьдзяць”.
Пакуль ніхто зь беларускіх чыноўнікаў на курорты ня зьехаў. Заяву на іхны адпачынак падпісвае непасрэдна Аляксандар Лукашэнка, і, зазвычай, дае дазвол адпачыць толькі пасьля поўнай справаздачы пра заканчэньне сяўбы.
