Сёлетняя брульская сустрэча – шостая – мае яшчэ адну асаблівасьць. Да мінулага году ў Брулі ладзілі выключна двухбаковую нямецка-беларускую імпрэзу.Тое, што цяпер на форуме прадстаўлены трэці ўдзельнік — Украіна, ёсьць, паводле нямецкіх аналітыкаў, добрай прыкметай. Гэта азначае, што досьвед двухбаковых дачыненьняў паміж Беларусьсю і Нямеччынай пашырыўся, што Нямеччына, а разам зь ёй і Заходняя Эўропа становіцца больш уважлівай да Беларусі і ўжо ня бачыць у гэтай краіне выключна ўсходнеэўрапейскага аўтсайдэра.
Мяркуецца, што заўтра падчас працы шматлікіх сэкцыяў у пытаньнях менскага офісу АБСЭ, гуманітарнай дапамогі, аздараўленьня дзяцей, наступстваў Чарнобыльскай катастрофы дый іншых можна будзе пачуць пра тыя новыя падыходы, якія Эўразьвяз распрацоўвае ў дачыненьні да Беларусі і Ўкраіны.
Ёсьць меркаваньні, што цяпер многія эўрапейскія палітыкі схільныя бачыць ня толькі палітычныя і эканамічныя адрозьненьні паміж Беларусьсю і Ўкраінай і на аснове гэтага ствараць прэфэрэнцыі для пэўнай краіны. Размова ідзе пра тое, што цяпер для абедзьвюх краін надзвычай актуальны пошук у гэтак званым эўрапейскім доме, што і Ўкраіна, і Беларусь прэтэндуюць на ролю мосту паміж Расеяй і Эўразьвязам. Адзначаецца, што ў абедзьвюх краінах створаны падмурак для грамадзянскай супольнасьці.
Вялікі ўплыў на зьмену мэнтальнасьці, псыхалёгіі, жыцьцёвых арыенціраў насельніцтва робяць шматлікія недзяржаўныя арганізацыі. Менавіта так лічыць вядомы нямецкі палітык, віцэ-старшыня Ландтагу Шлезьвіг-Гальштпайн, сябра нямецка-беларускага таварыства Габрыэла Кётшаў:
(Кётшаў: ) “Сама я зь вялікай цікавасьцю чакаю пачатку працы ў рабочых групах. Дагэтуль прынята было гаварыць пра розныя падыходы Захаду да Ўкраіны і Беларусі. Цяпер у зьвязку з пашырэньнем Эўразьвязу вакол пытаньняў гэтых дачыненьняў будзе весьціся вялікая дыскусія. Лічу, што Беларусь сёньня нават больш блізкая да Нямеччыны, чым Украіна. Гэта зьвязана з той плённай працай у гуманітарнай сфэры, якая на працягу апошніх дзесяці гадоў зьвязвае нашыя краіны. Аднак гэта маё асабістае меркаваньне”.
Заўтра ў часе працы гэтак званых круглых сталоў спадарыня Кётшаў будзе мадэратарам рабочай групы ў пытаньнях, зьвязаных з працай менскага офісу АБСЭ.
(Кётшаў: ) “Я толькі што гутарыла з амбасадарам Гайкенам, і мы абмяркоўвалі зь ім ягоны заўтрашні даклад. Я асабіста параіла яму скараціць прамову, а лепш больш часу прысьвяціць адказу на пытаньні. Я ведаю, што на нашую сустрэчу прыйдзе больш за ўсё ўдзельнікаў, у тым ліку шматлікіх крытыкаў новай лініі АБСЭ. Мне падаецца, што заўтра мусіць прагучаць як мага болей крытыкі, каб мы маглі абмеркаваць усе самыя вострыя пытаньні”.