Вірусным гепатытам у Тураве захварэлі ўжо 12 чалавек. Васьмёра зь іх — дзеці. Карантын уведзены ў дзьвюх сярэдніх школах і дзіцячым садку. Заняткі ня спыненыя, але школьныя сталоўкі зачыненыя. Праводзяцца розныя прафіляктычныя меры. Школьнікам, якія мелі кантакт з хворымі, уведзены імунаглябулін, які даставілі з Гомеля.
У мястэчку ў вадаводзе ўзмоцнена хляруецца пітная вада. Паводле інфармацыі адмыслоўцаў Жыткавіцкага раённага цэнтру гігіены і эпідэміялёгіі, разглядаюцца два варыянты распаўсюду жаўтухі.
Высьветлілася, што ня так даўно вірусным гепатытам хварэла сям’я мясцовага праваслаўнага сьвятара. Аднак па мэдычную дапамогу сьвятар не зьвяртаўся. Санслужба не выключае таксама і перадачу хваробы праз ваду. Пробы яе ў школе №2 не адпавядалі санітарным нормам паводле бактэрыялягічных паказчыкаў. Адмыслоўцы ўстанавілі цяпер пастку для вірусаў, каб дадаткова праверыць пітную ваду.
Дарэчы, захварэў на жаўтуху і школьнік зь вёскі Хільчыцы — суседняй з Туравам. А два гады таму моцная ўспышка гепатыту назіралася ў Хваенскай школе, Жыткавіцкай школе-інтэрнаце.
Начальнік эпідэміялягічнага аддзелу раённай санслужбы Аляксандар Ерас лічыць, што ўспышкі гепатыту зьвязаны таксама і з паслабленьнем імунітэту. З жаўтухай можна эфэктыўна змагацца, калі рабіць плянавыя прышчэпкі, якія аднак у краіне не прадугледжаны.
(Ерас: ) “Супраць віруснага гепатыту ў нас у Беларусі прышчэпкі ня робяцца. А вось у капіталістычных краінах такія прышчэпкі ёсьць. У нас, у школе-інтэрнаце для сірот былі ўспышкі гепатыту. Італьянцы, якія ўзялі шэфства над інтэрнатам, прыслалі вакцыну супраць гепатыту ў якасьці гумаітарнай дапамогі. Цяпер выхаванцам інтэрнату робяць прышчэпкі. Канечне, калі б была вакцына, і зрабіць такія прышчэпкі тураўскім школьніка і наведнікам дзіцячага садку, хвароба ўмомант спынілася б”.
Беларусь вакцыны ад гепатыту, як і ўсіх іншых інфэкцыйных хваробаў, не вырабляе. Таму многія бацькі тураўскіх школьнікаў, не чакаючы казённага імунаглябуліну, самі купляюць яго ў аптэках, робяць ін’екцыі і такім чынам імкнуцца падвысіць у сваіх дзяцей абарончыя функцыі арганізму. Аднак адмыслоўцы сьцьвярджаюць, што імунаглябулін усё роўна цалкам не засьцерагае ад захворваньня на жаўтуху.