558-ы Баранавіцкі авіярамонтны завод — прадпрыемства вайсковага падпарадкаваньня. Да распаду Савецкага Саюзу ён быў адным з найбольш буйных у краіне прадпрыемстваў такога тыпу. Тут рамантаваліся самалёты Ту-17 і Ту-22. За апошнія дзесяць гадоў заводу давялося зьведаць шмат: і масавыя скарачэньні працаўнікоў ды згортваньне вытворчасьці, і эканамічныя ўздымы.
Усё залежыць ад наяўнасьці заказаў, а іх апошнім часам бракуе. Калі яшчэ год таму прадпрыемства давала львіную долю прыбытку ў баранавіцкі гарадзкі бюджэт, то сёньня і тут запазычанасьці сталі звычайнай зьявай. Сярэдні заробак застаўся на ўзроўні студзеня мінулага году і не перавышае 100 даляраў.
Штопраўда, дзякуючы сёньняшняму візыту Аляксандра Лукашэнкі некалькі тыдняў працаўнікі Баранавіцкага авіярамонтнага заводу былі бесьперапынна занятыя працай — парадкавалі тэрыторыю, фарбавалі, прыбіралі, старанна рыхтаваліся да прыезду кіраўніка дзяржавы. За двайную аплату людзі ахвотна выходзілі працаваць у выходныя дні.
Візыт Лукашэнкі дазволілі асьвятляць толькі дзяржаўным сродкам масавай інфармацыі. Пра што была размова падчас сустрэчаў і адмысловай нарады, невядома. Нават старшыні прафсаюзнага камітэту Мікалаю Чыжыкаву, які знаходзіцца ў апазыцыі да адміністрацыі прадпрыемства, было забаронена пад пагрозай прымяненьня зброі выходзіць са свайго працоўнага кабінэту, пакуль Лукашэнка не пакіне прадпрыемства.