У Марыямпале (Сувалькія, Літва) пахаваны савецкі палкоўнік Андрэй Арманд, які загінуў тут ў часе другой сусьветнай вайны.
Існуюць сьведчаньні гісторыкаў, што Андрэй Арманд – сын Інэсы Арманд і У. Ульянава-Леніна, які нарадзіўся у 1903 г. у Парыжы, калі І. Арманд мела найбліжэйшыя стасункі з У. Ульянавым-Ленінам.
Пасол Расеі ў Літве Юры Зубакоў учора афіцыйна ўшанаваў магілу А. Арманда як магілу савецкага вайскоўца і загадаў супрацоўнікам зрабіць неабходныя захады дзеля пацьверджаньня доказаў яго паходжаньня.
Літоўскія мэдыі зазначылі, што пасол Расеі ў Літве яшчэ раз выкарыстаў нагоду падкрэсьліць клопат Расеі пра савецкіх вайскоўцаў – і пра жывых, і пра іх магілы. Пасол паведаміў, што Расея штогод вылучае на пэнсіі савецкім вайскоўцам у Літве 1 млн. 800 тыс. даляраў (вайскоўцы атрымоўваюць да 500 даляраў у месяц). Што да магілаў, то толькі летась на аднаўленьне савецкіх вайсковых могілкаў у Марыямпале Расея вылучыла каля 30 тыс. даляраў, і сёлета, як паведаміў пасол Расеі, працы па ўпрыгожваньню могілкаў будуць працягвацца. Тым часам, калі мясцовы праваслаўны кляштар папрасіў Расею аб дапамозе, пасол Расеі адразу адмовіў.
