Лінкі ўнівэрсальнага доступу

ЭЎРАЗЬВЯЗ РЫХТУЕ ПРАГРАМУ ДАЧЫНЕНЬНЯЎ З НОВЫМІ СУСЕДЗЯМІ


Натальля Судлянкова, Прага

У зьвязку з тым, што Чэхія разам з шэрагам былых сацыялістычных краінаў рыхтуецца далучыцца да аб’яднанай Эўропы, на парадку дня былі пэрспэктывы новых дэмакратыяў у Эўразьвязе. Але зараз, пасьля таго, як асноўныя парамэтры далучэньня ўжо практычна ўзгодненыя, гаворка ішла таксама пра ролю новых дэмакратыяў у адносінах Эўропы з суседзямі.

Асновай для дыскусіі стала прамова старшыні Эўракамісіі Рамана Проды наконт ініцыятывы для новых суседзяў і пляны Эўразьвязу ў дачыненьні да краінаў СНД, у прыватнасьці, Беларусі. Гюнтэр Вэргойген заявіў, што гэтая праграма пакуль знаходзіцца ў стадыі падрыхтоўкі і блізкім часам будзе прадстаўленая на разгляд Эўракамісіі. Як мяркуецца, асноўным тэзісам праграмы будзе падтрымка працэсаў дэмакратызацыі ў краінах, якія мяжуюць з Эўразьвязам. Менавіта ў нармальных добрасуседзкіх адносінах з, напрыклад, Беларусьсю, Украінай ды Расеяй бачыць Эўразьвяз і гарантыю свайго нармальнага разьвіцьця.

Натуральна, закраналася і пытаньне далейшага пашырэньня Эўразьвязу. Гюнтэр Вэргойган адзначыў, што тыя 10 краінаў, якія зараз далучаюцца да аб’яднанай Эўропы, мусяць прайсьці даволі доўгі шлях, каб іхныя эканамічная сытуацыя і структуры грамадзтва наблізіліся да сярэднеэўрапейскіх. На ягоную думку, гэты працэс можа расцягнуцца на 15-20 гадоў. У дачыненьні какрэтна да Беларусі, Расеі і Ўкраіны Гюнтэр Вэргойген сказаў:

“У дадзены момант гэтае пытаньне неактуальнае. Я насамрэч ня ведаю, што менавіта адбудзецца ў аддаленым будучым, але ў найбліжэйшай будучыні, як мяркуецца, будзе створанае так званае “кола сяброў”, якое будзе ахопліваць самыя розныя дзяржавы на межах Эўразьвязу – ад Расеі да Марока. У рамках гэтага кола мы будзем распрацоўваць самыя розныя формы супрацоўніцтва, і нават самае шчыльнае супрацоўніцтва. Магчыма, напрыклад, стварэньне зоны вольнага гандлю, мытнага саюзу, магчыма, нават увядзеньне элементаў агульнага вольнага рынку – вялікая колькасьць самых розных праектаў можа быць рэалізаваная ў межах разьвіцьця нашага супрацоўніцтва. Але пакуль ніхто ня можа дакладна сказаць, якім будзе канчатковае рашэньне наконт палітычнай геаграфіі Эўразьвязу”.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG