Сёньня прэзыдэнт Расеі Ўладзімер Пуцін, камэнтуючы вынікі рэфэрэндуму, заявіў, што “народ Чачэніі зрабіў выбар на карысьць міру і разьвіцьця разам з Расеяй. Прадстаўнікі чачэнскіх паўстанцаў заявілі, што рэфэрэндум ня мае юрыдычнай сілы. Сп-р Дукаеў, на Ваш погляд, якое палітычнае значэньне мае рэфэрэндум, які адбыўся ўчора ў Чачэніі?
(Дукаеў: ) “Палітычнае значэньне рэфэрэндуму палягае ў тым, што кіраўніцтва Расеі і прамаскоўскае кіраўніцтва Чачэніі нарэшце здолела заканадаўча аформіць факт уваходжаньня Чачэніі ў склад Расеі. Тое, супраць чаго чачэнскі народ змагаўся 12 гадоў, расейскае кіраўніцтва здолела ўмацаваць заканадаўчым шляхам”.
(Дракахруст: ) “Сп-р Дукаеў, наколькі сапраўднымі Вам падаюцца афіцыйныя вынікі галасаваньня? 71% яўкі, 96% галасоў ў падтрымку новай Канстытуцыі – гэта 68% ад ўсяго насельніцтва”.
(Дукаеў: ) “Ад 1991 году Чачэнія жыла паводле сваёй Канстытуцыі , згодна зь якой яна ёсьць сувэрэннай дзяржаваю. Чачэнія ніколі не падпісвала з Расеяй фэдэратыўнай дамовы. У 1997 годзе Чачэнія абрала прэзыдэнта і парлямэнт. Гэтыя выбары былі прызнаныя законнымі ня толькі міжнароднымі назіральнікамі, але і самой Расейскай Фэдэрацыяй. З абраным кіраўніком Чачэніі Масхадавым падпісваліся дамовы ў Крамлі. Мэтаю рэфэрэндуму і было якраз скасаваньне гэтых нязручных рэчаў – касуецца Канстытуцыя, дзе гаворыцца пра незалежнасьць Чачэніі, касуецца законна абраны народам лідэр. Зараз адчыняецца шлях да новых прэзыдэнцкіх і парлямэнцкіх выбараў.
Што тычыцца лічбаў яўкі, то ў выбарчыя сьпісы было ўнесена больш за 500 тысячаў выбаршчыкаў. Але нават у самыя лепшыя даваенныя гады ў Чачэніі не было столькі выбаршчыкаў. Зразумела, у сьпісы ўнесеныя вайскоўцы, але туды не патрапілі дзясяткі тысячаў людзей, якія выехалі з Чачэніі ў Расею і ў іншыя краіны. Так што гэтыя лічбы даволі сумнеўныя. Ну а тое, што за Канстытуцыю прагаласавала 96%, гэта ўвогуле нагадвае добрыя савецкія часы”.
(Дракахруст: ) “Сп-р Дукаеў, Вы сказалі, што рэфэрэндум адчыняе шлях да новых выбараў. Як Вы мяркуеце, ці будуць паўстанцы ўдзельнічаць у іх?”
(Дукаеў: ) “Сілы супраціву, зразумела, ня прымуць вынікі гэтага рэфэрэндуму. Чачэнскі лідэр Аслан Масхадаў заявіў у інтэрвію нашаму радыё, што баявыя апэрацыі будуць працягвацца, вайна ня спыніцца, пакуль, паводле ягоных словаў, апошні расейскі салдат не сыдзе з чачэнскай зямлі. Мне здаецца, што ў чачэнскай сытуацыі пасьля рэфэрэндуму нічога ня зьменіцца. Хутчэй за ўсё вайна, будзе працягвацца”.
