Сёньня ў цэнтры Віцебску было надзвычай людна. Бо бадай ніхто зь віцяблянаў, якія пільна сочаць за выпускамі навінаў ды разьвіцьцём падзеяў у Іраку, не абмінуў сёньня тутэйшых апазыцыянэраў, што выйшлі да “Сіняга дому” з плякатам “Тэрарыст Хусэйн зрабіў закладнікам увесь ірацкі народ”.
Абмеркаваньне мінакамі палітычных падзеяў з удзелам Уладзімера Плешчанкі, Аляксандра Салаўяна ды Барыса Хамайды неўзабаве ператварылася ў невялікі стыхійны мітынг. Прычым інтарэс да замежнага канфлікту хутка вычарпаўся, і ўвага землякоў пераключылася на другі плякат у руках пікетоўцаў, са словамі “Амэрыка, дапамажы й нам пазбавіцца ад дыктатуры Лукашэнкі ды саюзу з крымінальнай Расеяй”.
У выказаных на плякатах меркаваньняў знайшлося нямала і прыхільнікаў, і апанэнтаў. Аднак гарачыя спрэчкі паміж тымі й другімі перарваў нарад АМОНу. Міліцыянты загадалі прысутным разысьціся, а спадарoў Плешчанку, Салаўяна ды Хамайду завезьлі ў пастарунак. Спачатку намесьнік начальніка Чыгуначнага райаддзелу спадар Марзавін пагражаў апазыцыянэрам арыштам без суду ды сьледзтва, аднак абмежаваўся затрыманьнем на тры гадзіны ды складаньнем пратаколу за несанкцыянаванае пікетаваньне.
