Учора ў Ленінскі раённы аддзел міліцыі Менску прывезьлі 25 чалавек. Сярод іх лідэр Маладога Фронту Павал Севярынец і арганізатары акцыі Вячаслаў Сіўчык і Валянцін Баранаў.
У Маскоўскі аддзел міліцыі прывезьлі 20 затрыманых. Сярод іх два непаўнагадовыя школьнікі. Аднаго, Зьмітра, амонаўцы схапілі ў Чырвоным касьцёле. Імі займаліся інспэктары па справах непаўнагадовых. Яны вагаліся, ці складаць адміністрацыйны пратакол. Насамрэч і школьнікаў, і астатніх міліцыянты затрымалі ля Чырвонага касьцёлу прэвэнтыўна, да пачатку акцыі. Таму не было падставаў складаць адміністрацыйныя пратаколы за парушэньне грамадзкага парадку.
Каля Чырвонага касьцёлу затрымалі й жонку Вячаслава Сіўчыка Ганну зь сямігадовым сынам Вітаўтам. Паводле адміністрацыйнага заканадаўства, непаўнагадовага ня маюць права ўтрымліваць больш за гадзіну без бацькоў. У гэтым выпадку бацькі самі трапілі ў міліцыю. Міліцэйскае кіраўніцтва вырашыла ўсіх затрыманых на плошчы Незалежнасьці адпусьціць.
У гарадзкі аддзел міліцыі Ленінскага раёну прывозілі затрыманых журналіста БелаПАНу Аляксея Шэіна і назіральніка “Вясны” Віталя Кошалева. Міліцыянты пратрымалі іх каля гадзіны і адпусьцілі. Ва ўпраўленьні ўнутраных справаў Ленінскага раёну сярод затрыманых было шмат жанчынаў. Некаторыя зь іх пацярпелі ад амонаўцаў падчас затрыманьня. Міліцыянты жанчын і мужчынаў сталага ўзросту адпусьцілі пад падпіску, каб самі прыйшлі ў панядзелак у міліцыю. Адтуль іх павязуць у суд.
Арганізатараў акцыі Вячаслава Сіўчыка і Валянціна Баранава будуць судзіць паводле другой часткі сумнавядомага 167 артыкулу. Ім пагражае вялікі штраф альбо арышт ад 10 да 15 сутак.
